الرئيسيةاهلاً بكمالتسجيلدخول


شاطر | 
 

 رِوَآيَــهـ {غُــمُــوض خَــآلِـــدْ}

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : الصفحة السابقة  1, 2
كاتب الموضوعرسالة
ὼiɲtҽr ƒloώęr♫
محقق لامع
محقق لامع


المسآهمآت . : 598

مُساهمةموضوع: رد: رِوَآيَــهـ {غُــمُــوض خَــآلِـــدْ}   الثلاثاء أكتوبر 15, 2013 5:35 pm

✿فلسفة مبدع ✿ كتب:
 

بسم الله الرحمن الرحيم
السلاام عليكم و رحمة الله و بركاته
كيف حالك اختي ؟؟ ان شاء الله بخيير
166 166 166 166 
قصةة محزنة قطعت قلبي 79 
بس متشوقة اعرف النهاية
اتمنى تكمليها ..
مشكوورة كثييير
قصة راائعة جداا
اختيار موفق
يعطيك الف عافية
بانتظار التكملة
تقبلي مروري
166 166 166 166 
وفقك الله و بارك فيك
و جعلك قرة عين لوالديك
تحياتي ( أميرة )
في امان الله ....
مشكورة اختي على مرووك الجميل ^^
راح اكمل الروايه لعيونك

ايه صح مرورك مقبول طبعا ^^
الرجوع الى أعلى الصفحة اذهب الى الأسفل
ὼiɲtҽr ƒloώęr♫
محقق لامع
محقق لامع


القسم المفضـل . : قسم المتحري كونآن ♥
الآنمي المـفضل . : Death Note
الجنـس . : انثى
المسآهمآت . : 598
شهرة العضو : 15
المـوقـع . : حَاليًّـا ، في أعمَآق الخَيال "،
العـمــر . : 17

مُساهمةموضوع: رد: رِوَآيَــهـ {غُــمُــوض خَــآلِـــدْ}   الثلاثاء أكتوبر 15, 2013 6:43 pm





*5*

الثلاثاء
بعد صلاة الفجر بفترة ,,, خلود وسالم راحوا لمدارسهم ,,, وبعدها طلعت من البيت ,,, شفت سيارة خالد قدامي وتذكرت اللي صار البارح ,,, التفتت لبيت ابو عبد الله ,,, ياترى وشلون نفسيته الحين ,,, الله يستر عليه بس
وصلت سلمى ومعاذ ,,, ورحت للمدرسه
بعد ماجينا من المدارس ,,, تفاجأت بسيارة خالد الى الحين موجودة وشكلها ماتحركت ,,, لا يكون ماراح للمدرسة اليوم ,,, ليتني اقدر اشوفه الحين
الظهر وحنا نتغدا
خلود = خالد محتاجه المكتبه
انا = خلود ماعندي سيارة قولي وش تبين واجيبه لك
خلود = بس لازم انا اروح ,,, خالد ادري ان ماعندك سيارة بس مضطرة انا اروح طالبين مني طلبات عمل لازم اجيبه وووو ,,, وابي الصيدلية عشان معاذ ,,, لازم اروح انا
سشوات الحين لازم اشحذ سيارة يعني اففففف
انا = متى تبين .؟
خلود = اليوم
انا متضايق = ان شاء الله احاول ادبر سيارة واوديك
بعد العصر طلعت من البيت وانا كاره اني اشحذ ,,, بس شسوات لااااازم ,,, اف بس
رحت لماجد وكان بعيد عنا شوي طلبت سيارته ووافق
رجعت البيت واخذت خلود ومعاذ ,,, حاولنا نغطي كل الاحتياجات بمشوار واحد وباقل الاسعار لأن مامعي الا 280 ريال بس
المغرب
كان البزران يلعبون وخالد وابراهيم بسيارة خالد
حاولت اتفحص خالد من بعيد ,,, من البارح ماشفته ,,,
وقفت السيارة بنص الشارع لأن خالد موقف سيارته قدام بيتي ,,, وبعد مانزلت خلود ,,, نزل خالد من سيارته وجا عندي
خالد مستغرب = من سيارته هذي .؟
انا = ماجد
خالد = افااااااااا تاخذ سيارة ماجد وسيارتي واقفة قدامك
انا متفشل = بيض الله وجهك ماتقصر ,,, بس ماحبيت ازعجك ,,, آآآآآ ,,, بروح ارجع السيارة لراعيها ( والتفتت له اتفحصه من قريب ) وشلونك الحين .؟
خالد بابتسامة = بخير ,,, رح وصل السيارة لراعيها وتعال احتريك هنا
وابعد خالد عن السيارة ,,, مشيت وطلعت من الحارة ,,, سلمت ماجد سيارته ورجعت مشي ,,, وفعلا لقيت خالد بسيارته يحتريني لكن هالمرة ابراهيم ماهو عنده ,,, ركبت سيارته
انا = خالد اليوم رحت لمدرستك .؟
خالد = لا
انا = ليه ,,, لا يأثرون عليك ياخالد
خالد بتنهيده = خلنا من هذا ( التفت لي ) كم رقم جوالك .؟
وش فيه ذا نسى
انا = قلتلك ماعندي جوال
خالد = انت بعت الرقم والجهاز والا بس الجهاز .؟
معلومة جديدة الارقام تنباع
انا مستغرب = الرقم بعد ينباع .؟
خالد = ايه بعض الارقام تنباع ,,, ليه تبي تبيع رقمك بعد .؟
بسم الله كشفني مالت عليه ,,, فعلا لو ادري ان الارقام تنباع كان بعت رقمي من زمان
خالد = كم رقم جوالك .؟
انا = ماعندي جهاز وش تبي فيه .؟
خالد = خالد ليش تبيع اغراضك .؟
تفاجأت من سؤاله ,,, طالعت قدام وسكتت
خالد = خالد ليش تبيع اغراضك ,,, ليش بعت جوالك وسيارتك
انا بعصبية = انت وش تتوقع ليه ابيع اغراضي ,,, بالعقل يعني ليه ,,, بعت جوالي وسيارتي ولو عندي شي بعد ابيعه بعته ,,, عندي اربعة اصرف عليهم ولا عندي لا وظيفة ولا شي وديون ابوي من جهه واجار البيت من جهه ,,, وش تبيني اسوي ,,, اسرق قلي اسرق .؟
سكتت اهدي نفسي شوي وكملت
انا = دورت وظيفة بس ماحصلت كل اللي حصلته وظيفة وحدة بس وليلية بعد ( التفتت لخالد ) وش تبيني اسوي اترك دراستي واترك اخواني لأخر الليل لحالهم واشتغل في الوظيفة الليلية والا تبيني اسرق احسن
قعد يناظرني خالد وهو ساكت ,,, وطول وهو يناظرني ,,, لين تضايقت من نظراته
انا = عن اذنك
فتحت الباب ونزلت ودخلت البيت ودخلت غرفتي وانا متضايق وافكر بهمي شسوات الحين شسوات اترك دراستي ,,, يااااربي شسوات
قمت وطلعت من غرفتي اشوف خالد راح والا لا ,,, فتحت الباب بشويش عشان خالد مايشوفني ,,, لكن مازال بسيارته وشكله يفكر ,,, وش فيه ذا ليه مايدخل بيته ,,, او يروح أي مكان ,,, رجعت الغرفة وبعد نص ساعة وانا بغرفتي تفاجأت بجرس الباب ,,, قمت اشوف من ,,, وكان خالد
انا مستغرب = خالد !
خالد بابتسامه = اليوم الثلاثاء ومضطر اروح للرياض قلت اودعك قبل اسافر
انا مستغرب = تسافر .؟ والدراسة بكرة ,,, لا تقول بتغيب بعد
خالد بابتسامه = ايه غياااااااب
انا = تراك تغيب واجد الاربعاء اللي فات غايب واليوم غايب وبكرة بعد ,,, لا تنسى انك بثالث
خالد بتنهيدة = شسوي اهلي هناك ,,, بس قبل اروح حبيت اقولك الله بيفرجها ان شاء الله ... مع السلامة
انا بحزن = ان شاء الله ,,, مع السلامة
سلمت عليه وسكرت باب البيت وقبل ادخل غرفتي تذكرت شباب السوء اللي أمس ,,, ركضت بسررررعه برا البيت ,,, لكن تأخرت ,,, قد راح ولا لحقت عليه
الله يستر عليك ياخالد ,,, يارب احفظه ,,, اخاف يتعرضون له ,,, يارب رجعه بالسلامة ,,, ليت معي جوال اتصل عليه ياليييييييت
الاربعاء
سألت ابو عبد الله عن خالد وقال انه بالرياض وبيجي يوم الجمعه كعادته كل اسبوع ,,, الله يستر اخاف الشباب يتعرضون له ,,, حسبي الله عليهم وصلت فيهم يحرقونه ,,, فعلا ان جليس السوء إما أن يحرق ثيابك وإما أن تجد منه ريحاً خبيثة
الخميس في الليل
وحنا نتعشى رن جرس الباب ,,, قام سالم يشوف من ,,, وجاني يقول ان فيه رجال يبيني ,,, رحت للباب وتفاجأت بابو يوسف صاحب البيت اللي انا فيه
انا = هلا ابو يوسف
ابو يوسف = السلام عليكم
انا = وعليكم السلام ,,, تفضل ياعم حياك
ابو يوسف = الله يبقيك ,,, بس مستعجل
انا = آمر
ابو يوسف = والله مدري وش اقولك لكن الظروف حدتني ياولدي
سكتت عنه احتريه يكمل
ابو يوسف = 2من عيالي بيتزوجون و يبون سكن ومثلك عارف ياولدي مو معقول استاجر بيت والبيت هذا عندي
انصدمت
انا = بس ياعم اجار البيت باقي له 4 أشهر ,,, اصبر علي الله يخليك
ابو يوسف = انا والله عارف يولدي بس منحد آخذ البيت ,,, عيالي وين يسكنون هم وحريمهم ,,, وانا عارف بضروفك وصدقني اني كاره اطلعك منه و آجار البيت متنازل لك عنه ,,, بس مضطر اني آخذه منك
انا = ابو يوسف اذا طلعت من البيت هذا وين اروح الله يخليك ياعم الله يخليك يابو يوسف انا ماعندي وظيفة ولا شي وين تبيني اروح ويييين ,,, اترجاك يابو يوسف اترجاك ماتطلعني منه وووووانا ابحاول ادفع الاجار بس لا تطلعني منه الله يخليييييييك
ابو يوسف = لا حول ولا قوة الا بالله ,,, ياخالد انا مضطر ,,, مو معقول عيالي يستاجرون وهالبيت عندي ,,, خالد مضطر اخذ البيت منك وانا ابعطيك مهلة مو 4 اشهر 5 اشهر اذا بغيت واجار البيت هالسنة متنازل لك عنه وش تبيني اسوي اكثر من كذا ,,, السموحة منك وياولدي ,,, وانا اعرف ضروفك لكن منحد ,,, مع السلامة
سكرت الباب وظليت بمكاني واقف منصدم ,,, وين اروح ,,, من وين استاجر ,,, شسوات شسواااااااااااات
جلست ببطئ على الارض وسندت ظهري على الباب ,,, وماقدرت امنع دموعي ,,,
اروح لعمي .؟ ,,, عمي 200 ريال يالله يالله طلعهن منه يقوم يسكني عنده انا والجيش اللي معي ,,, وين اروح وش اسوي
بعد 5 دقايق قمت ودخلت غرفتي وسكرت على نفسي مابي احد مابي اكلم احد ,,, وين اروح ويييييين
الجمعه
صرت ماطلع الا للمسجد وارجع للبيت على طول مابي احد مابي احد
السبت
مارحت للمدرسة وظليت حابس نفسي بالغرفة حابس نفسي مع همي ,,, حاولت خلود تكلمني ,,, لكني ماكلمت احد مازلت حابس نفسي ,,, لازم اترك الدراسة خلاص واروح اشتغل لو فراش زي ماقال عمي ,,, بس انا مابي اترك الدراسة ابي اكمل ,,, ابي على الاقل اخذ شهادة الثانوي ,,, بس وشلون اكمل وين اسكن ,,, من وين القى وظيفة . من وين القى بيت وانا مامعي حتى 200 ريال ,,, شسوات آآآآه ياربي
جاني سالم وكلمني من ورا باب غرفتي
سالم = خالد ابراهيم يبيك عند الباب
وظل يكررها لكن انا مابي اكلم احد ,,, ليه مايتركوني بحالي ,,, مل سالم وهو يكررها وراح
انسدت نفسي عن الاكل ,,, صرت ماطلع من غرفتي الا عشان اشرب ماء وبعدها ارجع غرفتي
الاحد
في الصباح طلعت من غرفتي وكان البيت فاضي اكيد خلود هي اللي توصل سلمى ومعاذ لبيت ابو سعد ,,, هذا اليوم الثاني اللي اغيب فيه عن المدرسة ,,, ياربي شسوي ,,, كيف ابستاجر وانا معي شي ,,, حتى وظيفة ماعندي ,,, مضطر اروح لعمي لو يذلني المهم يدبرنا
الظهر طلعت من البيت رايح للمسجد ,,, طبعا المسجد الظهر يكونون المصلين قليل اللي بمدرسته واللي بدوامه قعدت بالمسجد الى الساعة 1 افكر بهمي وادعوا الله يفرجها لي ,,, ياربي ضاقت ياربي فرج همي يارب
رجعت البيت ولقيت سالم موجود
انا = متى رجعت .؟
سالم = توني رجعت
انا = رح جيب سلمى ومعاذ من بيت ابو سعد
راح سالم وجابهم وبعدها جت خلود ,,, وحنا نتغدا
خلود = خالد وش فيك .؟ لك يومين غايب ومانت طبيعي
انا = بعد اربع اشهر لازم نطلع من البيت
خلود بصدمة = وشلووووون .؟ ليه نطلع .؟ ,,, ووين نروح .؟
انا = بنروح لعمي ,,, ابو يوسف يبي بيته
خلود = عمي ماراح يتحملنا ( بكت ) لا خالد مانبي نطلع ,,, خالد فكر زين لا تطلعنا ,,, مانبي نطلع مانبي نطلع
قمت متضايق ورحت غرفتي ,,, حتى انا مابي اطلع بس غصب عني ,,, هنا فيه ذكريات امي وابوي ,,, والمصيبة اذا طلعنا وين نروح ,,, ومن وين
العصر
جاني سالم بغرفتي
سالم = ابراهيم وخالد يبونك عند الباب
انا = قلهم تعبان
راح وسالم وجا مرة ثانية
سالم = عيوا يروحون يقولون لازم نشوفه
انا بعصبية = سالم تفهم والا ماتفهم ,,, قلهم تعباااان
خاف وراح شوي وجا مرة ثانية وهو خايف ,,, يارب طولك ياروح
سالم بخوف = عيووو يروحون وووو دخلوا المجلس
اففففففففف ,,, قمت ورحت للمجلس وكان مجلسنا عربي ,,, دخلت عليهم وبعد السلام
ابراهيم = وينك يارجال غايب يومين ,,, ومختفي ,,, عسى ماشر .؟
انا = تعبان
ابراهيم = ماتشوف شر ,,, بس سالم يقول حتى غرفتك ماتطلع منها
نزلت راسي وسكتت ,,, قام خالد وجلس ملاصق لي وهمس باذني
خالد بهمس = عشان الوظيفة .؟
اول ماسمعت سؤاله ماقدرت امنع دموعي غطيت وجهي عنهم وبكيت بصمت
ليته على الوظيفة بس ,,, البيت والوظيفة وكل شي كل شي انا واخواني مالنا مكان نسكن فيه ,,, مالنا دخل ناكل منه
قعدت افكر بالهم و ابكي بصمت
تذكرت ابراهيم و خالد ورفعت راسي ,,, ولقيتهم على وضعهم تفشلت منهم ومن دموعي اللي نزلت قدامهم
انا = السـ السموحة
لف خالد ذراعه علي
خالد بابتسامة = مسموح
ابراهيم = خالد فضفض ناقصك شي ترانا بالخدمة افاااا عليك بس
انا بحزن وعصبية = ناقصني الوظيفة تقدر تجيبها لي .؟ تقدر .؟ تعبت وانا ادور كللللللللهم يبون شهادة كمبيوتر من وين اجيب لهم شهادة من ويييين ,,, الوظيفة الوحيدة اللي تناسبني حارس ,,, حاااااااارس يابراهيم حارس لأخر الليل ,,, اخواني صغاااار قلي اذا توظفت فيها وين اوديهم قلي من يصير عندهم لأخر الليل
ابراهيم = عند عمك
انا بسخرية = هه عمي
ابراهيم = انت من زمان بلا وظيفة وش اللي خلاك توصل لهالحاله وتعزل العالم حتى مدرستك صرت ماتروحلها
طلعت دموعي غصب وسكتت ,,, رص خالد ذراعه علي اكثر يقربني منه ويشجعني اكمل
انا بحزن = راعي البيت اللي انا ساكن فيه يبيني اطلع
رفع خالد ذراعه عني متفاجئ
خالد = تطلع .؟
ابراهيم متفاجئ = تطلع ,,, ليه .؟ ,,, عشانك مادفعت .؟
انا = يبيني اطلع منه عشان عياله اللي بيتزوجون يسكنون فيه
خالد = عن اذنك خالد شوي وراجع
قام وطلع من المجلس ,,, قام ابراهيم وجلس بجنبي
ابراهيم = الله يعين ,,, ماقلت لي عشانك مادفعت .؟
انا = انا مادفعت وهو تنازل بس هو مصر على البيت
ابراهيم = خالد حنا معك وحولك ,,, انا ابدور لك على وظيفة غير الحارس وان شاء الله القى ,,, اما موضوع البيت والله مادري وش اقولك لكن انت حاول براعي البيت يمكن يتراجع وانا ابكلم ابوي
انا = تسلم ابراهيم ماتقصر
ابراهيم = انا استاذن الحين ,,, مع السلامة
بعد ربع ساعة وانا بمكاني ,,, دخل المجلس سالم ومعه خالد وابو عبد الله ,,, قمت اسلم على ابوعبد الله ,,, وجلست بجنب ابو عبد الله وخالد جالس قدامنا
ابو عبد الله = الله بيفرجها ياولدي ,,, خالد قالي على كل شي
رفعت راسي لخالد
ابو عبد الله = انا بكلمه وادفع له اجار البيت عساه يتراجع ويخليكم
نزلت راسي
انا = هو تنازل عن الدفع للسنه هذي
ابو عبد الله بفرح = جزاه الله خير ,,, يعني تراجع
انا = تنازل بس مصر يبي البيت
سكت ابو عبد الله شوي وبعدها
ابو عبد الله = متى قالك راعي البيت تطلع .؟
انا = عطاني مهلة 4 او 5 اشهر
ابو عبد الله = خالد لا تشيل هم ياولدي رح انت و خالد ودوروا لكم على بيت او شقة قريب من مدارسكم وانا ابدفع الاجار
التفتت عليه
انا = ياعم من وين .؟
ابو عبد الله = انا بدفع ياولدي خل موضوع الاجار علي
انا = ياعم انا ماني مغفل ادري ان ماعندك الا راتب تقاعدك ( نزلت راسي ) تسلم ياعم ماتقصر بس انا مابي اصير عاله عليك
ابو عبد الله = صح ان ماعندي الا راتب التقاعد بس ماعندي احد اصرف عليه ( وكمل بمزح ) ماعندي الا عجيزي هههه
انا = البيت او الشقة ماتقدر تسكن فيها الا اذا دفعت مقدم منـ
وقاطعني خالد وحط يده على ركبتي
خالد = عندك حل ثاني .؟
سكتت
خالد = مثل ماقال خالي لا تشيل هم ,,, وعندنا مهلة 4 شهور ندور فيها شقة قريب من هنا وان شاء الله نلقى ,,, اسمع بعد صلاة العشا نطلع انا وانت ونسأل ,,, اتفقنا
انا = بس احس اني ثقيل عليـــ
خالد = مانت ثقيل ولا شي
ابو عبد الله = لا تزعلني منك ياولدي معزتك من معزت خالد
خالد = ماعليك منه ياخال ,,, خالد بس يتغلى علينا هههههههههه
بعد العشا طلعنا انا وخالد ندور على شقة قريبة
ولقينا شقة صغيرة ومناسبة وقريبة اكثر شي لمدرسة خلود وبعيدة عن مدرستي والحارة
راعي الشقة = الى كم شهر تبونها .؟
خالد = سنه
انا = لا مو سنه ,,, آآآ ,,, تقريبا لـ 3 اشهر
التفت خالد لي مستغرب
خالد = ليه .؟
قربت منه عشان مايسمعنا راعي الشقة
انا = مابي اثقل على خالك ابو عبدالله ,,, يدفع اجار 3 اشهر لين القى وظيفة وان شاء الله اذا لقيت بعدها انا امدد سنه
خالد = لا ماعليك ماتثقل ولا شي ( والتفت لراعي الشقة ) نبي الشقة لسنة
انا = لا مو سنة
راعي الشقة = جايين تلعبون انتم ,,, روحوا اتفقوا وبعدين تعالوا
خالد = متفقين متفقين (والتفت لي ) اسكت ولا كلمة ( ورجع يلتفت لراعي الشقة ) نبيها لسنة
راعي الشقة = عقد الشقة مع مستأجريها الحاليين ينتهي بعد شهر ونص لكن يجب عليكم دفع مقدم 5000 ريال
انا منصدم = مقدم 5000 مو كأنه كثيييييييير
راعي الشقة = مو تبونها سنة ,,, اجار الشقة خلال سنة كاملة 28 الف مع الكهرباء والماء والانترنت والشقة مفروشة احدث فرش
انا = طيب مانبي انترنت بكم يصير .؟
خالد = والمقدم متى ندفعه .؟
راعي الشقة = اذا كنتم معتمدين تبونها ,,, الافضل يكون الدفع الأن ونكتب العقد ,,, لأن اذا مادفعتوا يمكن يجي زيون أخر ويدفع قبلكم وتكون الشقة من نصيبه
خالد = خلاص اتفقنا
انا = لا ماتفقنا
خالد بعصبية = خالد وش فييييييييك
راعي الشقة يسألني = فيه مشكلة .؟
خالد = لا مافيه مشكلة ( وضربني برجله )
راعي الشقة = الشقة تبونها باسم من .؟
خالد = باسم هذا ,,, اكتب العقد معه وانا بروح اسحب المبلغ واجي ,,, عن اذنك
وراح ,,, يسحب المبلغ .؟ ,,, يسحب المبلغ من مين .؟ ,,, يمكن قصده ياخذ المبلغ من ابو عبد الله ,,, اهااا يمكن
راعي الشقة = الاسم الكريم .؟
كتبنا العقد وجا خالد ودفع المقدم له ونستلم الشقة بعد شهرونص ,,, طلعنا من المكتب وركبنا سيارة خالد
انا = خالد انت قبل شوي قلت اسحب المبلغ ,,, تسحبه من مين .؟
خالد = اسحبه من الصرافة
انا = بطاقة الصراف حقت خالك معك .؟
خالد مستغرب = خالي !! ( وكأنه تذكر ) اهااا ,,, ايه ايه بطاقة خالي معي ,,, الحمد الله ومشكلة البيت وانحلت ههههههه
انا = الحمد الله وصلني لخالك الحين
خالد مستغرب = الحين .؟ ليه .؟
انا = ابي اشكره ,,, والله من دونه مدري وش كنت بسوي
ابتسم خالد ووصلني عند بيت ابو عبد الله ودخلنا
انا = مشكوووووور ياعم ,,, فكيت ازمة بيض الله وجهك ( وحبيت راسه )
ابو عبد الله = ماسوينا الا الواجب ياولدي ,,, بس ماشاء الله عليكم لقيتوا شقة بهالسرع ,,, انا قلت يمكن ماتلقون شقة الا بعد يومين
استغربت كلامه ,,, وشلون مايدري اننا لقينا شقة وهو اللي دفع المقدم
انا مستغرب = ايه لقينا بس ماتفضى الا بعد شهر ونص ,,, وشلون تسأل ياعم مو خالد جاك قبل شوي واخذ منك المقدم .؟
خالد = آآآآ ,,, ماتعرفه يعني خالي دايم ينسى ,,, آآآآ ,,, المهم الحين مالك عذر تغيب ,,, اعلمك عليه ياخال غايب له يومين
ابو عبد الله = وانت كل اربعاء تغيب
خالد منصدم = افااااا قلبت علي
ابتسمت
ابو عبد الله بعصبية = ايه اقلب عليك ,,, كل اربعاء تغيب والاسبوع اللي راح غبت الثلاثاء والاربعاء ,,, ماتعلمني متى تخلي هالطبع
حك راسه حسيته تورط مع خاله
خالد = كل اربعاء اروح للرياض عند اهلي
ابو عبد الله بعصبية = هذا ماهو عذر
خالد = اعصابك ياخال اعصابك ,,, ايه صح ماضيفنا خالد ,,, ابروح اضيّفه هاه ابروح اضيّفه
وهرب من المجلس ,,, ابتسمت ,,, الحمد الله يارب لقيت شقة بس لازم القى وظيفة عشان اسدد لابو عبد الله لا يمكن اكون عاله عليه لا يمكن
الاثنين
قومت خلود وتجهزنا للمدارس واخذت معاذ وسلمى ,,, تفاجأت بسيارة صالح واقفة قدام بيتي ,,, لا حول ولا قوة إلا بالله هذا يحاول بأي طريقة يضايق خالد
وصلت سلمى ومعاذ ورحت المدرسة
الظهر
وحنا داخلين شارعنا
ابراهيم = صالح اشوف سيارتك واقفة قدام بيت خالد
صالح = انا حر ,,, وبعدين خالد ماعنده سيارة
ابراهيم = تصرافاتك تصرفات بزر
ضرب صالح ابراهيم بظهره بقوة
صالح = انا بزر .؟
ابراهيم = اوووووه لا لا مانت بزر اهههههههببببب عليك
مسكين خالد يلقاها من رفقاه السوء والا يلقاها منك ياصالح
انا = صالح اترك خالد بحاله
صالح = مالكم دخل فينا
بعد صلاة العصر بساعة
انا = خلود امسكي سويلم لا يطلع خليه يحل الواجب ,,, وين سلمى .؟
خلود = نايمة
انا = طيب انا بطلع تبين شي .؟
خلود = لا
طلعت من البيت ابي اسولف مع احد ,,, مالقيت بالشارع الا الاطفال يلعبون ,,, مشيت ابي اسأل الاطفال اذا شافوا احد من الشباب والا لا ,,, لكن تفاجأت باللي قدامي ,,, بسم بالله الرحمن الرحيم وش ذا .؟
كانت درايش سيارة خالد الامامية والخلفية كلها مفتوحه ,,, وماشوف إلا رجلين طالعة من عند الدريشة الخلفية للسيارة ,,, رحت للسيارة لأنها واقفة قدام بيت ابو عبد الله ولما قربت عرفت من صاحب الرجلين ,,,
كان خالد لابس بنطلون جنز وفنيله بيضا مخططه ومتمدد بالمرتبة الخلفية ومطلع رجلينه من عند الدريشه ومغطي وجهه بكتاب الفيزياء والكتب الباقية متوسدها وشكله نايم
وش فيه ذا نايم هنا ,,, تلفتت يمين ويسار وبعدها التفتت لخالد المتمدد
انا = خالد ,,, خالد ( مديت يدي وحركت رجله ) خااااالد
رفع الكتاب عن وجهه وبعد ماستوعب
خالد = خالد .؟ افففف ليش قومتني
انا = فيه احد ينام بالسيارة ,,, ليه نايم هنا .؟
خالد متضايق = وفيه غيره .؟ ,,, صالح مطيح عند عمته من الظهر ماخلاني انوم وخالي ماهو فيه
انا = ههههههه انت وصالح شييييييي هههههههه ,,, طيب ليه ماتنام بغرفتك .؟
خالد بسخرية = قصدك الملحق .؟
انا بابتسامة = المهم تنام بسريرك .؟
خالد = صالح أخذ المفتاح السبير للملحق من عمته وكل شوي داخل علي ويزعجني ,,, اف قسم بالله مليييييت ,,, بكلم خالي يسمح لي اطلع من بيته ,,, ماني قادر اتحمل ,,, ناشب بحلقي ياخي
انا = وهو وينه الحين .؟
خالد = بالبيت
انا = الله يعينك عليه ,,, صالح يمووت بالمشاكل ,,, اجـ
= من تكلم .؟
التفتت لصاحب الصوت
اوووووه صالح ,,, التفتت مرة ثانية لخالد
انا = صالح شرّف
خالد بعصبية = ابن امه يقول شي ,,, بسيارتي ماني ببيت عمته
وغطى وجهه بالكتاب ,,, وصل صالح ووقف بجنبي وطالع من عند الدريشة يشوف خالد المتمدد
صالح = هههههههههههههاي نايم هنا هههههههههههههههه بصورك
مارد عليه خالد ولا رفع الكتاب حتى ,,, مسكت ذراع صالح
انا = صالح امش خلنا نسولف
صالح = لا لا اصبر
مد صالح يده ونزل جزمة خالد اليمنى وحطها على بطن خالد ,,, لا حول ولا قوة إلا بالله بتبدأ الهوشة الحين
وخر خالد الجزمة عن بطنه بصمت وهو مازال مغطي وجهه ,,, تمادى صالح ومد يده مرة ثانية ونزل الجزمة الثانية وحطها ببطن خالد
وبسرعة مفاجأة رفع خالد الكتاب عن وجهه ورماه على جبهة صالح
مسك صالح جبهته وهو يتألم
صالح = اخخخخخخخ عورتني
خالد بعصبية = تستااااااااهل
فتح صالح الباب الخلفي بسرعه ودخل السيارة وركب فوق خالد ,,, اووووهووووه كيف افكهم الحين ,,, تلفتت ابي احد يساعدني ,,, ابراهيم محمد ماجد أي احد ,,, لكن مافيه بالشارع الا الاطفال
توجهت بسرعة للباب الخلفي الثاني من جهة راس خالد وهو متمدد ... وحاولت افكهم
انا = صالح قم خلاص فكه يارجال ,,, صااااالح
كان مازال فوق خالد وركبته على بطن خالد ويعطيه من هالبكوس ,,, سمعت جوال واحد منهم يرن ,,, وبعد ماركزت بالنغمة عرفت انه جوال خالد ,,, المشكلة المكان ضيق ,,, دخلت السيارة من عند راس خالد وحاولت ابعد صالح عنه
انا = صالح بس صااااالح
دفعني صالح بيده
صالح = اذلف والا توطيت ببطنك انت الثاني
ورجع يضرب خالد ,,, قدر خالد يمسك يدين صالح وحاول يمسك راس صالح برجليه لكن صالح اعرض منه
رن جوال خالد مرة ثانية ,,, جيت من الجهه الثانية ومسكت صالح من الخلف وحاولت اجره ,,, واخيرا مع مسكتي له ومع مسكت خالد ليديه قدرنا نسحبه برا السيارة
صالح وانفاسه سريعة = اوريك ,,, ماخليك ,,, تشوف ( والتفت لي ) وانت الثاني اوريك
وراح ,,, اف اخيرا
التفتت لخالد اللي كان بالسيارة جالس وانفاسه سريعة ,,, رحت له وطليت عليه والبيبان مازالت مفتوحة
انا = الى متى يعني انت وصالح .؟
تناول من الطبلون منديل ورجع يجلس بمكانه بالمرتبة الخلفية وقعد يمسح جرح بوجهه وانفاسه مازالت سريعة
خالد = لا بالرياض مرتاح ولا هنا مرتاح
انا = قلــ
وقاطعني رنين جوال خالد
انا = هذا ثالث مرة يرن
دور خالد جواله ولقاه طايح بارض السيارة ,,, القى نظرة عليه
خالد وانفاسه سريعة = اووووه أمي ,,, يعني ماتتصل الا الحين
مسح خالد وجهه بيديه واخذ نفس عميق يهدي نفسه
خالد = هلا ,,, وعليكم السلام هلا يمه ,,, وشلونكم .؟ ,,, انا بخير ,,, هاه لا صوتي مافيه شي ,,, لا عادي بس كنت نايم ,,, هههههه نومة العصر احلى شي ,,, لا صدقيني بخير ,,, لا ابد يمه مافيني شي ,,, ايه اكيد حتى اسألي خالي ,,, ايه اكلته ,,, والله اكلته ,,, يمه وش فيك قلتلك مافيني شي حتى بكرة ابجي وتشوفيني بنفسك ,,, ويخليك لنا ,,, كيف .؟ ,,, والله فكرة حلوة خلاص اجل تجهزوا وانا جايكم ,,, ان شاء الله ,,, طيب ,,, ان شاء الله ,,, اطمئني ,,, ان شاء الله ,,, مع السلامة
سكر جواله واخذ نفس كأن خايض معركة ,,, ضحكت عليه
انا = هههههههههههههههه الله يخليها لك
خالد = آمين ,,, تعاملني كني بزر
انا = من خوفها عليك خاصة انك الولد الوحيد لها
هز خالد راسه وسكت ,,, لاحظت بوجه خالد شي ,,, وقربت وجهي من وجهه اشوفه
انا = اووووه خالد هنا كدمة حمرا ( وأشرت بجنب فمه ) اخاف يتحول لونه ازرق هذا غيرالجرح اللي تحت عينك
خالد بعصبية = حسبي الله عليه كسر فكي
انا = وش بتقول لخالك اذا شافك بهالشكل .؟
خالد = بطلع باخذ شقة واطلع مليت مليييييييت
ومسك ظهره وابعد الفنيلة عن جلده
خالد = ااااحححححح
انا = وش فيك .؟
خالد = احس ببلل بقميصي اظن سال دم من الجرح
تذكرت الجرح اللي بظهره ووخرت يده اشوفه ,,, شفت فنيلته بمكان الجرح تغير لونه الى احمر خفيف
انا = فنيلتك فيها دم
خالد متضايق = مادري متى يـبرا
المغرب
جاني سالم وانا بالبيت اسولف مع خلود
سالم بغرور = خالد انا معزوم
طالعنا بعض انا وخلود
خلود مستغربة = من هذا اللي ماعنده ذوق وعزمك .؟
انا = هههههههههههههه
سالم ومازال رافع خشمه = عمي ابو عبد الله
خلود = امششششششش ياولد
ضحكت على خلود
خلود = هههههههههه اقول سويلم وش قالك بالضبط اشك انه عزمك
سالم = قال رح لاخوك خالد وقله ترا عشاه عندي وبعدين قال تعال معه انت يعني خلاص عزمني ابرووووح
خلود وانا = هههههههههههههه
انا = طيب طيب بس هااااه تصير رجال وتتأدب
سالم = انا رجال
بعد صلاة العشا
كنا ببيت ابو عبد الله لكن هالمرة معنا صالح والله يستر تصير هوشة
كنت جالس بجنب خالد قربت منه عشان ماحد يسمعنا
انا بهمس = وش قال خالك يوم شاف الجروح اللي بوجهك .؟
قرب مني
خالد بهمس = سألني قدام مرته ولا قدرت اقول تهاوشت مع صالح
انا = وش قلت اجل .؟
خالد = قلت طحت
انا = كذبة واضحة
خالد = وش اسوي اخاف يتهاوش مع مرته وتكبر السالفة وانا ابي اطلع ,,, وبعدين كلها سنة وارجع للرياض ان شاء الله ,,, وش استفيد اذا سببت طلاقها خاصة ان خالي ماله عيال
انا = ضيعــ
صالح = وش تقولون انتم .؟
اعتدل خالد بجلسته
خالد = مالك دخل
صالح = ماسألتك ,,, خالد وش تقولون .؟
ابو عبد الله = وش تبي فيهم انت ,,, رح هات القهوة من عند عمتك
صالح = ان شاء الله عمي
وراح ... التفت خالد لي وبعدها التفت لخاله
خالد مرتبك = آآآآ ,,, خالي ,,, انا ,,, آآآآ ,,, وشسمه ,,, انا ابي اطلع
ابو عبدالله مستغرب = تطلع تروح وين .؟
خالد مرتبك = آآآآ ,,, لا يعني ,,, آآآآ ,,, ابي اطلع بشقة لحالي
ابو عبد الله متفاجئ = وشلوووون .؟ افااااا تطلع بشقة وبيتي موجود ,,, ليه قصرت عليك بشي ,,, ناقصك شي ,,, ولا ماتبي تسكن معي
خالد مرتبك = لا ياخال انت الخير والبركة ,,, بس انا ,,, آآآآ
ابو عبد الله بعصبية = ليه تبي تطلع .؟ خالتك ضايقتك بشي ,,, قلتلك انت اللي داخل وهي اللي برا ,,, انت ولدي ,,, انا مالي ولد غيرك ,,, انت ماتبيني .؟ ماتبي تسكن معي .؟
خالد = لا ياخال لا تفهمني غلط ,,, مالي غنى عنك
ابو عبد الله بعصبية = اجل ليه تبي تطلع .؟
بعد ما دخل صالح المجلس ,,, نزل خالد راسه وسكت
ابو عبد الله بعصبية = ليه تبي تطلع .؟
خالد بحزن = انسى خلاص ماني طالع ,,, أهم شي رضاك
سكت عنه ابو عبد الله وهو الى الحين زعلان منه ,,, التفت لي خالد ونظرته لي فيها خيبة أمل ,,, مرت ساعة كاملة وابو عبد الله الى الحين يتجاهل خالد ولا يعبره حتى بكلمه ,,, واذا كلمه خالد مايرد عليه يقاله زعلان منه
فجأة رن جوال خالد
خالد = الو ,,, وعليكم السلام هلا ,,, عفوا من معي ,,, من طرف من .؟ ,,, ( ابتسم واسترخى في جلسته ) هلااا هلااا ,,, تأخر علي في الرد وبعدين ليش مايكلمني هو .؟ ,,, نعم .؟ ,,, لا يالحبيب ماراح اغير كلامي ,,, اجل يشوفله مكان ثاني ,,, ابداً هنا ويبدأ من العصر ,,, لا يالحبيب لا تحاول ,,, قلتلك يشوفله مكان ثاني ,,, ادري ,,, لا ,,, مر اسبوع ولا شفت شي ,,, اسمع عاد عنده اسبوع واحد بس والا يدبر نفسه ,,, كلامي ماعيده ,,, ايه هنا ويبدأ من العصر ,,, نعم هذا آخر كلام عندي ,,, حياك الله ,,, مع السلامة حياك الله
خالد اللي يكلم قبل شوي مو خالد اللي اعرفه مو خالد صاحب الابتسامه العذبة ,,, ابتسامته اللي قبل شوي ,,, مدري وشلون حسيته كنه يهدد احد
ابو عبد الله مستغرب = من كنت تكلم .؟
خالد = واحد
صالح = ندري انه واحد بس منهو .؟
خالد = انت مالك دخل
ابو عبد الله = تغير كلامك عن وش .؟
خالد = آآآآ ,,, ياخال هذا واحد صاحبي معي بالمدرسة ,,, ماعليك بس ماعليك
ابو عبد الله بخوف = خالد وليدي لا يكونون الشباب رجعوا لك مرة ثانية ,,, هم هنــ
وقاطعه خالد
خالد = خال وش فيك هذا واحد صاحبي يبي مني ,,, آآآآ ,,, كتاب ,,, وبس
الشباب يهددونه ماهو اللي يهددهم ياعم ,,, وخالد قبل شوي كنه يهدد مايهُدد
صالح = هات هات جوالك اشووووف
خالد = اقول انت لا تتدخل
صالح = شايف عمي شايف خالد اكيد يبي يجيب لنا مشكلة
خالد معصبية = كلن يشوف الناس بعين طبعه
ابو عبد الله بخوف = الجروح اللي بوجهك منهم ,,, صح .؟
طير خالد عيونه بخاله وبعدها التفت معصب لصالح
خالد = لا مو منهم
صالح مستغرب = مين اللي منهم ياعم .؟
خالد بعصبية = انت اسكت ,,, وش تبي في بيت خالي رح بيتكم
صالح بعصبية = هذا بيت عمتي
خالد بعصبية = ياخي اذيتنا بعمتك ( التفت لخاله ) الجروح اللي بوجهي من صالح ياخال
ابو عبد الله بحزن = والله اني خايف عليك منهم ,,, ماني متطمن ,,, بس ماقول إلا الله يحفظك ياولدي ويخليك لي ولميمتك
خالد = صدقني ياخال من هذا ( التفت لصالح معصب) اوريك
بعد عشر دقايق طلب ابو عبد الله من صالح يجيب العشا من عند عمته
وبعدها رجعت البيت وانا افكر بخالد ,,, مدري ليه ماني مرتاح من المكالمة اللي قبل شوي ,,, لازم اسأله واعرف ,,, ياترى وش وراك بعد ياخالد



الحمد لله خلص البارت تعبت وانا الون 110 

الرجوع الى أعلى الصفحة اذهب الى الأسفل
✿فلسفة مبدع ✿
محقق مشارك
محقق مشارك


القسم المفضـل . : قسم المتحري كونآن ♥
الآنمي المـفضل . : Naruto
الجنـس . : انثى
المسآهمآت . : 536
شهرة العضو : 0
المـوقـع . : In the hearts of my wonderful friends

مُساهمةموضوع: رد: رِوَآيَــهـ {غُــمُــوض خَــآلِـــدْ}   الأحد أكتوبر 20, 2013 12:37 pm

 

بااارت رااائع
استمتعت بقراءته كثيير
اتمنى تكمليها بسسرعة
الله يخليك 31  
الرجوع الى أعلى الصفحة اذهب الى الأسفل
ὼiɲtҽr ƒloώęr♫
محقق لامع
محقق لامع


القسم المفضـل . : قسم المتحري كونآن ♥
الآنمي المـفضل . : Death Note
الجنـس . : انثى
المسآهمآت . : 598
شهرة العضو : 15
المـوقـع . : حَاليًّـا ، في أعمَآق الخَيال "،
العـمــر . : 17

مُساهمةموضوع: رد: رِوَآيَــهـ {غُــمُــوض خَــآلِـــدْ}   الجمعة أكتوبر 25, 2013 10:22 pm

*6*

الثلاثاء
بعد صلاة العصر كانت خلود زعلانه من سلمى وكعقاب لها منعتها تلعب مع الاطفال برا ,,, جلست بحجرة التلفزيون العب مع معاذ ,,, جاني سالم وقال ان خالد يبيني ,,, اخذت معاذ معي وطلعت
خالد بابتسامة = تعال اركب
فتح سيارته وركب بمكان السواق ,,, وركبت بجنبه
انا = نعم
خالد = كم رقم جوالك .؟
يارب طولك ياروح
انا بعصبية = ياذا الرقم اللي اذيتني فيه كم مرة اقولك ماعندي جوال ماعنديييييي
خالد = ههههههههههههههههههههههههه هههه
انا بعصبية = وش فيك تضحك يامجنون
خالد = الرقم باسمك الى الحين والا لا .؟
انا = ايه الى الحين موجود
خالد وهو يطلع جواله = يله عطني الرقم
انا مستغرب = وش تبي فيه .؟
خالد = انت عطني رقمك ولا عليك
انا = واذا عطيتكياه وشلون برد عليك
خالد = يله خالد كم .؟
بعد ماعطيته الرقم
انا = هه ارتحت الحين ,,, وش بتستفيد منه وانا ماقدر ارد عليك
فتح خالد الدرج اللي قدامي وطلع منه كرتون جهاز نوكيا يشبه جهازه من الموديلات الاخيرة ,,, ومده الكرتون لي
خالد بابتسامة = الحين تقدر ترد علي ,,, انا الحين بمشي للرياض ومضطر اروح ويصير بينا اتصال
طالعته متفاجئ ,,, مدري ليه حسيت بالاهانة ,,, مدري ليه حسيته انه مشفق علي ,,, طلعت من سيارته بصمت ومن دون مارد عليه ودخلت البيت ,,, عطيت خلود معاذ ورحت غرفتي
وحنا نتعشى سألت سالم
انا = سالم شفت خالد بعد العصر .؟
سالم = راح الرياض
انا = قالك شي .؟
سالم = سلم علي وقال انه بيروح للرياض
سلمى = هو ليه دايم يروح للرياض .؟
سالم = امه وابوه هناك
سلمى = ياحظه عنده ام واب

الاربعاء
كنت مع صالح وابراهيم وماجد طالعين من المدرسة الظهر ,,, بعد ماتوجه ماجد لبيته دخلنا شارعنا وتفاجأنا بسيارة خالد واقفة قدام بيت ابو عبد الله
صالح مستغرب = هذي ماهي سيارة خويلد .؟
انا مستغرب = إلا ,,, أمس راح للرياض ,,, عجيب ماهو بالعادة يرجع الحين
صالح = افففففففف يعني ماحنا مرتاحين منه
ابراهيم مستغرب = تعرفون السيارة هذي لمين.؟ ,,, اول مرة اشوفها هنا ,,, والغريب واقفه قدام بيتنا
كانت جيب لاندكروزر جديدة واقفة قدام بيت ابراهيم
صالح مستغرب = اسأل الهندي اللي فيها يمكن لواحد من قرايبكم
رحنا للهندي السواق
صالح = مين انت .؟

الهندي = انا اسلام

ابراهيم = مين بابا انته .؟
اسلام = انا بابا كالد
التفتوا لي
صالح وابراهيم = تعرفه .؟
انا = لا ,,, اول مرة اشوفه ( التفتت على صالح ) يمكن يقصد خالد تركي
صالح = الحين خالد المفعوص ذا صار بابا ( والتفت على الهندي معصب ) انت من وين فيه يجي .؟
اسلام = من رياد
صالح بعصبية = الحين انا ماني متحمل خالد يجيني هنديه
انا و ابراهيم = ههههههههههههههههههههههههه ههههههههه
ابراهيم = اسكت انت اسكت ياخبل ( والتفت على اسلام ) انته ليه فيه يجي .؟
اسلام = ماما ام كالد فيه يجي
ابراهيم مستغرب = اهل خالد هنا
صالح = اووووووووووه لاااااااااااااا كملت الحين خالد بياخذ راحته
ابراهيم بعصبية = صدق انك فاضي
سألت الهندي اسلام
انا = وابو خالد هنا .؟
اسلام = لا
انا = ليه .؟
اسلام = ابو كالد مافيه يشوف انا ,,, يشوف بس شوي شوي ,,, انا فيه شغل عند بابا كالد بس
استغربت والتفتت لصالح
انا = صالح ممكن تفسر
صالح = ابو خالد بكندا
انا متفاجئ = بكندااااا ,,, ليه ماعلمتني
صالح = وانا وش دراني انك ماتدري ,,, انت 24 ساعة معه وش دراني انه ماعلمك ,,, اقول بس خلونا نتصل عليه نطلعه ( وطلعه جواله ) ابرهيم كم رقمه .؟
ابرهيم = وش تبي فيه ,,, خل الرجال عند اهله
صالح = عطني رقمه بس
ابرهيم = لا
صالح = يوووه ( والتفت لاسلام ) هيه انت اتصل على خالد خله يطلع يله اتصل اشوف
اسلام = حاضر
كلمه الهندي وطلع خالد لابس بنطلون وفنيله زيتيه وجا عندنا
خالد = السلام عليكم
الجميع = وعليكم السلام
ابرهيم = ارجع ياخالد لاهلك هذا بس صالح غصب سواقكم يتصل عليك
صالح = انت ماهو المفروض بالرياض وش جابك .؟
انا = صالح وبعدين معك ( والتفتت لخالد ) متى جيت .؟
خالد = اليوم الساعة 9 ( وابتسم ) واهلي هالمرة معي
ابرهيم = افهم انكم بتستقرون هنا .؟
خالد = لا طبعا ,,, بس الوالدة واخواتي حبوا يسلمون على خالي ,,, وابرجعهم يوم الجمعه للرياض
ابرهيم = اهاا خلاص اجل مانعطلك عن اهلك ,,, مع السلامة
وكل واحد دخل بيته
ابو خالد بكندا ,,, طيب ليش الهندي يقول انه مايشوفه ,,, ايه صح تذكرت ,,, خالد مرة قال اذا شفته انا خليت سالم يشوفه ,,, وش يقصدون خالد والهندي بانهم ماشافوه... وش يسوي ابو خالد هناك ,,, ماني فاهم شي
قبل آذان المغرب بساعة طلعت من البيت ولقيت خالد وابراهيم واقفين يكلمون ماجد اللي واقف بسيارته بنص الشارع وشكله بيمشي ,,, رحت لهم
انا = السلام عليكم
الجميع = وعليكم السلام
ماجد = تروح معنا خالد .؟
انا = وين .؟
ماجد = انا وابراهيم بنروح لصالة السيارات ,,, امش معنا
انا = لا ,,, مرة ثانية إن شاء الله
ابرهيم = امش يارجال لا يفوتك ,,, امش قبل يسكرون للصلاة
انا = الصلاة ماباقي لها الا ساعة مايمدي
ماجد = الا يمدي وعندنا المغرب بعد ,,, امش بس
انا = لا لا مرة ثانية
ماجد = كيفك
ركب ابراهيم وراحوا ,,, التفتت لخالد اللي مازال واقف
انا = ليش مارحت معهم .؟
خالد = ماني مشتهي اروح
انتبهت اني الهندي الى الحين بالسيارة الجيب
انا = هذا الى الحين بالسيارة ,,, ليه مايدخل
خالد = وين يدخل .؟
انا = يدخل بيت خالك يعني وين يدخل
خالد = وليش يدخل .؟
انا مستغرب = عشان يرتاح يحول مسكين يمكن تعب من الجلوس بالسيارة
خالد متضايق = ووين تبيه يرتاح ,,, اذا كان عمه اللي هو انا ينام بالملحق هو وين تبيه ينام .؟
مت ضحك عليه
انا = ههههههههههههههههههههههههه ههههههههههههههههههههههههه
خالد يبتسم = يارجال خلها على الله ,,, انا استأجرتله بفندق يرتاح فيه وماعليه ان شاء الله
انا = ههههههه الله يعينك ,,, ماتسمع صالح اليوم وش يقول ,,, ههههه يقول انا ماني متحمل خالد يجيني هنديه هههههههه
خالد = برتاح منه بهالعطله ههههههه ,,, المهم اسمع خالد
انا = هلا
خالد = وتراك معزوم الخميس,,, بكرة خالي مسوي عشاء بمناسبة زيارة اهلي عنده ,,, العشاء في استراحة مستأجرة ,,, وخالي عازم كل الجيران اللي هنا ,,, انا عاد ماعرف احد هههه ماعزمت الا انت وابراهيم وماجد ,,, ومن العصر تكون موجود هناك
انا = من العصر .؟ مو كنه بدري ,,, لالا مابي اضايقكم ,,, يمكن اجي بعد صلاة العشا مثل المعازيم الثانيين
خالد = كل الشباب بيجون من العصر فيه مسبح هناك وبنتسلى و اصلا ماني مشاورك هههههه بكرة بمرك واخذك ,,, خالد ترا مو بس انت المعزوم اخوانك كلللللهم معزومين ,,, لا يجلس احد
نزلت راسي وسكتت خلود صعب تروح ,,, ماعندي سيارة اوصلها لاحتياجاتها المهمه وشلون عاد اوصلها لعزيمة ,,, اسكت عنه احسن
جانا اسلام
اسلام = بابا انا فيه يبي يروح
خالد مستغرب = تروح وين .؟
اسلام = ماما انته يقول مافيه يحتاج انا ,,, خلاص بابا انا يبي يروح نوم ,,,
دخل خالد يده بجيب بنطلونه وطلع كرت ومفتاح
خالد = خذ هذا عنوان الفندق اللي استأجرلك فيه وهذا مفتاح الغرفة ,,, رح وتعال بكرة الصباح
اسلام = حاضر بابا ,,, ( ورفع اصبعه السبابة يحذر خالد ) شوف ماما انته شو يبي بس شويه لين انا يجي ,,, مافيه روح منا منا ,,, مفهوم بابا
ضحكت على هالهندي الفلة والتفتت على خالد
انا = ههههههههههههههه مفهوم اسمع كلام عمك ههههههههههههه
خالد بابتسامه = تشوف انت ( والتفت للهندي ) حاضر عمي اطمئن ماني رايح مكان
راح اسلام ,,, و سولفت مع خالد شوي وبعدها رحنا نصلي المغرب
وحنا نتعشى
سلمى = يوووووه رز بعد
خلود = خالد اليوم ام عبد الله اتصلت علي عندهم عشا بكرة وعزمتني
انا = وش قلتي لها .؟
خلود = اعتذرت بس هي اصرت ,,, قلت لها ماعندنا سيارة قالت فيه سواق حنا بناخذك معنا
انا = وانتي تبين تروحين .؟
خلود = انا ودي اروح بس مستحية قالت ام عبد الله فيه بنات بيجن ,,, شكلها العزيمة كبيرة ,,, ابتصل بصديقاتي اذا كانوا بيجون بروح ,,, تقول ام عبد الله فيه بنات كبري من الرياض ,,, احسها تكذب علي تبغى بس تشجعني اجي
اخوات خالد ,,, ام عبد الله تقصد اخوات خالد بس مدري وش كبرهن
انا = الا فيه بنات من الرياض
خلود مستغربة = وش دراك .؟
انا = ام خالد واخواته هنا والعزيمة لهم
خلود = اووووه ماعندي لبس جديد ,,, بروح اشوف وش يناسب
وراحت حتى ماكملت عشاها
سالم = ام خالد جت .؟
انا = ايه
سالم = اجل بروح مع خلود ماني رايح معك
الخميس
العصر
خلود من الظهر وهي على قدما وساق قررت تروح مع ام سعد لانها تعتبرها زي امها وام سعد اقرب وحدة لخلود
والحين خلود تجهز نفسها بعد ماجهزت معاذ وسلمى وسالم ,,, وبعد ماطلعت خلود والجيش اللي معها وراحوا مع ابو سعد وام سعد ,,, طلعت من البيت ورحت لخالد اللي يحتريني من اول العصر ,,, ركبت سيارته
انا = السموحة تأخرت عليك
خالد = تتمكيج انت والا وش سالفتك
انا = ههههههههههه ايه تمكيجت بس نسيت استشور شعري هههههههه
ابتسم خالد ومشى رايح للاستراحة
انا = ماقالت شي امك يوم شافتك تنام بالملحق .؟
خالد = مشت عليها الكذبة اللي مشت على خالي
انا = والكدمة اللي بوجهك صار لونها ازرق وواضحة الحين
خالد = شافتها ,,, وقلت اني تهاوشت مع صالح وياليتني ماقلت
انا مستغرب = ليه .؟
تنهد وسكت
انا = ليه ياخالد .؟
خالد بحزن = بكت
انا متفاجئ = معقول ,,, ليه .؟
خالد = تقول انا خليتك تدرس عند خالك عشان انام وانا متطمنة عليك من بدر وربعه يطلع لك صالح هذا
حطيت يدي على كتفه
انا = امك وخالك خايفين عليك ,,, وترا صالح قلبه طيب صح يحب المشاكل بس تراه طيب
خالد = راح ادفّع صالح وبدر ثمن دمعة امي ( التفت لي ) صح اني وحيد ومريض وووو( طالع قدام ) وووبلا أب ,,, بس اقدر ادفعهم الثمن صدقني اقدر
انصدمت وشلون يقول بلا أب ,,, وابوووووه هو قالي بنفسه انه حي ,,, بس سكتت ولا سألته عشان نفسيته اللي تغيرت فجأة
انا = افاااا خالد وانا ماتعتبرني صديقك .؟
محاولتي لرسم الابتسامة بوجه خالد مانجحت مازلت اشوف نظرة التحدي بوجهه
واضح انه طفح الكيل معه ,,, فعلا يضايقونه وهو بالرياض ويلاحقونه الى هنا هذا غير صالح اللي يضايقه حتى وهو بمكان نومه
وصلنا ووقف خالد السيارة وقلت قبل ننزل
انا = خالد الله اذا أحب عبداً ابتلاه ,,, هذا اختبار وامتحان على صدق توبتك
غمض خالد عينه ببطئ وتنهد تنهيده حسيتها من قلب وفتحهن
خالد = الحمـ ,,, احم ,,, الحمد الله على كل حال ,,, يله وصلنا
ونزل بسرعة ,,, تغير صوته حسيته انه يجاهد الدمعة ,,, نزلت ودخلنا الاستراحة
المغرب
اكتمل تجمع الشباب ,,, انا وخالد وماجد واخوانه وصالح واخوانه وابراهيم واخوانه وسعد واخوانه
قررنا نسبح شوي وبعدها نروح للشيبان ونجلس عندهم قبل العشا ,,, دخلنا المسبح ولأن خالد الوحيد اللي عليه بنطلون نزل فنيلته وطلع جواله ومحفظته ومفاتيحه وحطهن بالارض وصاح
خالد = الاووووووووووووول
وطب في البركة
ماجد = وش عليك جاااااهز ,,, ماجبنا ملابس غيار
صالح = انا الحمد الله جبت غيار لي
نزل صالح ملابسه ومابقى الا بسروال وفنيلة وطب مع خالد
خالد وهو بالمسبح = هذي غرفة تنشيف تنشفك انت وملابسك
اول ماقال خالد كلمته نزلوا الشباب ثيابهم وطبوا ,,, بعضهم بقى بسروال وفنيلة وبعضهم مابقى الا بسروال ,,,
الا فايز اخو ابراهيم متزوج ماله شهرين ومازال عايش بالعسل
فايز = انا ماسبح مع عزابية ,,, انا الصراحة اخاف على كشختي تخرب
سبح خالد لين قرب منه وسحب رجل فايز وطاح هو وكشخته
ابراهيم = خل الحرمة تنفعك الحين هههههههههه
قربوا الشباب له وقعدوا يلبسونه الشماغ وهو بالماء ويلعبون عليه ,,,
التفت لي خالد وهو بالمسبح
خالد = خااااالد تعاااال ,,, ليه ماتسبح معنا
فايز = خايف على كشخته
انا = هههههه لا بس مالي نفس اسبح
شفت صالح يسبح لين وصل ورا خالد ومسك شعر خالد الطويل وكأنه بيربطه مثل البنات
صالح = شباصة شباصة من عنده شباصة شباب
ضرب خالد بكوعه على وجه صالح بعنف مع انه واضح ان صالح يمزح ,,, حسيت ان خالد صار مايتحمل حتى قرب صالح منه
خالد = وخر ( والتفت لي ) تعاااال خالد والا ترا الحيــ
قاطعه صالح ,,, حط يديه على اكتاف خالد وركب عليه ,,, و بسبب ثقله غطس خالد بالكامل داخل الماء ,,, نزلت ثوبي بلحق قبل تبدأ الهوشة لكن سبقوني ابراهيم وماجد اللي عارفين الوضع مع هالاثنين
ابراهيم = هدوا اللعب شباب
وابعدوا صالح ,,, واخيرا طلع خالد من تحت الماء واخذ نفس
صالح بعصبية = ماينمزح معه ,,, ضربني بوجهي
وقبل يتكلم خالد طبيت بالمسبح
انا = خلاااص انا جيت
فايز = قهوة ياشباب نبي قهوة هنا ,,, ياااااااااااااولد القهوة
سعد = هههههههههههه بايعها ,,, هذا اللي خايف على كشخته
رن جوال خالد ,,, وعطانا ظهره بيطلع ,,, مسك فايز حزام بنطلونه ورجعه للماء مرة ثانية
فايز = وين وين ,,, من اليوم وجوالات الشباب ترن الكل طنش ,,, طنش انت بعد
خالد = ياخي ماقدر اطنش لا تنسى اني المعزب
وطلع من المسبح وراح يرد على جواله ,,, سأل سعد الموجودين
سعد = وش اللي بظهره .؟
ماجد = شفته .؟ واضحه انها أكلة نار شكله يخرع
صاح ابراهيم عشان خالد يسمعه
ابراهيم = خاااااالد وش الجرح اللي بظهرك .؟
التفت لنا خالد والجوال بذنه وأشر لنا يعني اصبروا,,, بعد شوي جانا
خالد = معليش شباب مشغول شوي ,,, خالي يحتاجني خذوا راحتكم
ابراهيم = خالد وش الجرح اللي بظهرك .؟
خالد = جرح عادي ,,, يله عن اذنكم
عطاني نظرة و راح ,,, كأنه يقولي اياني واياك تقول لحد
لعبنا بالمسبح لين أذن العشا وبعدها رحنا نصلي ,,, وعلى الساعة وحدة الكل رجع بيته ,,, ورجعت انا واخواني البيت مع السواق اسلام مخصوص لنا وبعدها رجع اسلام للاستراحة لأن خالد واهله مازالواهناك يكملون سهرتهم لحالهم
الجمعة
بعد صلاة الفجر استأذنت من ابو محمد سيارته ورحت اهيم بالشوارع ابي وظيفة ابي شي ,,, انا واخواني لنا اسبوع ونص ماناكل الا الرز عشانا وغدانا رز وماعندنا من المشروبات الا الشاي وقرب يخلص بعد ,,, مامعي حتى 10 ريال ,,, لولا الله ثم عزيمة خالد اللي أمس كان ما حلينا واكلنا شي دسم وغيرنا في الاكل ,,, وعمي من هذاك اليوم ماجانا ,,, ابي وظيفة ابي أي شي أي شي ,,, رحت لسوق الخضار ابشتغل حمالي المهم القى شي ,,, سكر السوق على الاذان الاول وانا ماحصلت شي ,,, حسيت بخيبة أمل شسوات الحين
طلعت ومشيت بالشوارع وانا مدري وين اروح ,,, ماعندي الا اني اكد وان شاء الله احصل احد يبيني اوصله
المغرب
رجعت البيت وانا تعبااااان وهلكان وماحصلت من هالتعب الا 50 ريال ,,, الحمد الله نعمة ,,, يارب فرج همي يارب
السبت
جاني ابراهيم مرتبك وانا بالمدرسة
ابراهيم مرتبك = خالد خلنا نهرب
انا بابتسامة = ابراهيم الدافور يقـ
ابراهيم = خالد اتصل علي وصوته متغير يقول تعال بسرعة
انصدمت ,,, خالد
انا = ليه وش فيه .؟
ابراهيم = مدري بس يقول تعال بسرعة وصوته متغير ويالله يالله افهم منه شي
انا = وهو وينه الحين .؟
ابراهيم = بتحقق معي .؟ خلنا نهج من المدرسة واعلمك بعدين
رحنا للحوش وانتظرنا لين تخلص الفسحة وبمساعدة احد الشباب الخبير في الهروب
طلعنا من المدرسة وركضنا انا وابراهيم للحارة
ابراهيم = اخاف ادخل البيت اجيب مفاتيحي يعرفون اهلي اني هارب
انا بعصبية = صدق انك فاضي ,,, رح بسرعة
دخل ابراهيم بيته وجاب المفاتيح وانطلقنا بسيارته
انا = هو وينه .؟
ابراهيم = يحترينا بمواقف سوبرماركت بنده
اخاف تعرض له بدر وربعه ,,, المرة الاولى احرقوه ... هالمرة وش بيسوون فيه ,,, لا ... لا يمكن ,,, يارب استر يارب
سألت ابراهيم بخوف
انا بخوف = وش اللي خلاه يطلع من مدرسته بهالوقت و الساعة توها 9
ابراهيم = ماسألته ,,, اقولك يالله يالله يطلع الكلام منه ,,, صوته ضعيف ماسمع شي
انا بعصبية = ولييييييييه ماسألته .؟
ابراهيم = لا تصارخ علي ,,, قلتلك مافهمت منه شي ,,, الله يستر اخاف صار عليه حادث
انا بعصبية = وش حادث ما حادث انت بعد ,,, حادث وهو يقوللك يحترينا بمواقف السوبرماركت
ابراهيم = ايه صح ,,, اجل وش فيه .؟
انا = هات هات جوالك ابتصل عليه
عطاني ابراهيم جواله
انا = وش اسمه عندك .؟
ابراهيم = ابو وليد
اتصلت عليه ,,, خالد رد الله يخليك رد ,,, الله يستر وش سوا فيك بدر,,, شهقت يوم سمعت صوته
انا = الووو
خالد بضعف شديد = آلوووووه
يالله صوته ضعيف
انا بخوف = خالد وش فيك صارلك شي ,,, الو خالد
خالد وانفاسه ثقيله جدا = ابراهههييمم ,,, تعــ ,,, تعــ
انا = ان شاء الله ان شاء الله بنجي الحين ... بس قلي انت شفت بدر
خالد = خـ ,,, خــ ,,, خخخخالد تعــ .. ال بسـ
وماسمعت شي بعدها ,,, وين راح ذا
انا = الو الو خالد ,,, وين راح ,,, خالد الو خالد
ابراهيم مرتبك = قربنا باقي اشارة وحدة ,,, ان شاء الله انه بخير
وش طلعه من المدرسة وش فيه ,,, الله يستر الله يستر ,,, فجأة سألني ابراهيم وحنا واقفين عند الاشارة
ابراهيم = خالد منهو بدر .؟
هاه بدر ,,, انا قلت بدر ,,, متى .؟
انا = آآآآآ ,,, واحد من الربع
الرجوع الى أعلى الصفحة اذهب الى الأسفل
✿فلسفة مبدع ✿
محقق مشارك
محقق مشارك


القسم المفضـل . : قسم المتحري كونآن ♥
الآنمي المـفضل . : Naruto
الجنـس . : انثى
المسآهمآت . : 536
شهرة العضو : 0
المـوقـع . : In the hearts of my wonderful friends

مُساهمةموضوع: رد: رِوَآيَــهـ {غُــمُــوض خَــآلِـــدْ}   الأربعاء نوفمبر 06, 2013 7:41 pm

 

رااائع جدااا
كل بارت احلى من الثاني
بانتظار البقية ..
الرجوع الى أعلى الصفحة اذهب الى الأسفل
ὼiɲtҽr ƒloώęr♫
محقق لامع
محقق لامع


القسم المفضـل . : قسم المتحري كونآن ♥
الآنمي المـفضل . : Death Note
الجنـس . : انثى
المسآهمآت . : 598
شهرة العضو : 15
المـوقـع . : حَاليًّـا ، في أعمَآق الخَيال "،
العـمــر . : 17

مُساهمةموضوع: رد: رِوَآيَــهـ {غُــمُــوض خَــآلِـــدْ}   السبت نوفمبر 09, 2013 6:34 pm

* 7 *

وصلنا السوبرماركت وشفت سيارة خالد واقفة بالمواقف بشكل عادي ,,, وقف ابراهيم سيارته بجنب سيارة خالد ,,, ونزلت بسرعة ,,, فتحت باب خالد ,,, وكان جالس وانفاسه ثقيله ويئن وماله قوة حتى يرفع يده ,,, ناظرت وجهه ,,, وين ماشوف جروح ماشوف دم انا توقعت اني ابلقاه مكفخ ,,, تفحصت صدره وبطنه بيدي يمكن طاعنه بدر او شي لكن مافيه اثر جروح و ماعليه أي دم
انا = خالد
وجهه شاحب ويصب عرق ويئن
ابراهيم = خالد وش فيك .؟ ,,, عسى ماشر .؟
انا = خالد صارلك شي .؟
ابراهيم = وش فيه مايرد
انا = خالد رد علينا ,,, راسك يعورك .؟
حرك خالد راسه بايه تحريك خفيف
التفت لي ابراهيم
ابراهيم = يمكن حس بدوار ولا قدر يسوق ( والتفت لخالد ) نوديك المستشفى .؟
حرك خالد راسه بلا تحريك خفيف ورفع يده
خالد = الـ ... بيـ ...
ابراهيم = خلنا نشيله ونحطه بسيارتي بسررررعة
ركضت لسيارة ابراهيم وسدحت مرتبة الراكب ورجعت لبراهيم وشلنا خالد وحطيناه بمكان الراكب وركبت انا ورا ,,, وانطلق ابراهيم بالسيارة بعد ماقفل سيارة خالد
مدري وش اسوي ,,, فكيت ازارير ثوبه
انا = خالد اكلت علاجك اليوم .؟ خالد رد علي
يئن وواضح من ملامح وجهه انه يتألم من شي
انا = خاااالد رد علي اكلت علاجك .؟ ابراهيم رح للمستشفى بسرعة
هنا حرك خالد يده بلا
ابراهيم بعصبية = مايبينا نوديه المستشفى الخبل
انا = خلنا نوديك المستشفى ( والتفتت لبراهيم ) رح رح الطوارئ ماعليك منه
رفع خالد يده مرة ثانية

خالد = الـ .. بيــ ... ت ... البـ ... البيت

ابراهيم = وش يقول .؟
انا = عيا مايبي المستشفى ,,, يبي البيت
ابراهيم = وين نوديه الحين يمكن مانلقى خاله ابو عبد الله .؟

انا = لا لا ,,, اخاف مانلقى ابو عبد الله ويكسرنا صويلح تعرفه عاد انت مايداني خالد يصير بالبيت وابو عبد الله مو موجود
ابراهيم = اجل بنروح المستشفى
انا = بيتي انا الحين فاضي ,,, بنخلي خالد يرتاح فيه ,,, واحسن بعد يصير تحت نظرنا ( والتفتت لخالد ) خالد وش تحس فيه الحين
يئن وانفاسه بدت تهدأ اكثر كأنه يبي ينام
وصلنا ونزلت بسرعة افتح بيبان بيتي لبراهيم اللي قدر يشيل خالد بنفسه
فتحت المجلس ونزل ابراهيم خالد بالارض
انا = ماهو ثقيل عليك .؟
ابراهيم وانفاسه سريعة = لا ,,, نحيف
وقعد بالارض بجنب خالد
ابراهيم = خالد تسمعني .؟
انا = ابروح اجيبله ماء
وركضت للمطبخ ورجعت للمجلس ومعي كوب ماء
ابراهيم مرتبك = خالد الحق خالد مايرد علي ( والتفت لخالد ) خالد خالد

جلست بالارض مرتبك ,,, رفعت راسه وقربت الكوب من فمه احاول اشربه الماء
انا مرتبك = خالد اشرب ,,, خالد جبتلك ماء
ابراهيم مرتبك = خالد قم قسم بالله لعطيك كف يصحيك ,,, قمممم
انا مرتبك = خـ ,,, خالد اشرب
راسه يتمايل مع تحريك يدي اللي ماسكته
نزلت راسه ببطئ ,,, اول مرة اشوف احد يغمى عليه قدامي ,,, أنينه وقف وانفاسه هادية جدا كنه نايم
انا بحزن = بس ابراهيم ,,, شكله اغمى عليه
ابراهيم بخوف = اخاف مات
حط ابراهيم اذنه على صدر خالد
ابراهيم = اسمع قلبه
حطيت اذني على صدر خالد وسمعت نبضات قلبه وبعد شوي رفعت راسي ,,, جلسنا 3 دقايق وانا و ابراهيم نتأمل خالد وحنا ساكتين ماندري وش نسوي
انا = خلك عنده ابروح اجيب لحاف ومخدة
رحت وجبت لحافي ومخدتي ورجعت ولقيت ابراهيم الى الحين على وضعه
انا = قم خله يرتاح
ولحفته وحطيت المخدة تحت راسه ,,, وجلسنا انا وابراهيم آخر المجلس بعيد عن خالد
ابراهيم = مرة قالي صالح انه عنده مرض براسه بسبب حادث صارله
ابتسمت بسخرية صالح ,,, يعني يدري ومع ذالك هذي افعاله مع خالد وش النذالة اللي فيه
انا بسخرية = وماسألته ليه مايخليه بحاله يكفي خالد اللي فيه ,,, يجي يزيد عليه بحركاته اللي زي وجهه
ابراهيم = يقالك ماتعرف صالح
انا = المهم شافك احد من اهلك .؟
ابراهيم = لا ,,, رحت غرفتي ومحد شافني كلهم نايمين
أذن الظهر وخالد الى الحين ماصحى ,,, قام ابراهيم وجلس بجنبه وجلس يكلمه كنه يسمعه
ابراهيم = يله خالد آذن الظهر قم صل ,,, ( وتغير صوته ) قم صل خالد
استغربت تصرفه توني ادري ان ابراهيم حساس بهالمواقف ابتسمت ,,, ياحليلك يابراهيم ,,, قمت وجلست بجنب ابراهيم
انا = بيقوم ان شاء الله ,,, قم خلنا نروح نصلي
ابراهيم = بسيارتي عطر خلنا نشممه يمكن يقوم
انا = لا خله يرتاح ,,, هو مرة قالي انه ارتاح بعد ماغمى عليه ,,, خله ,,, يله قم
فجأة رن جوال ابراهيم
ابراهيم = اوووه هذا صويلح ( ورد ) الوووو ,,, انا بالبيت ,,, خالد ,,, مدري عنه يمكن ببيته ( والتفت لي يبتسم ) ,,, يله يله صالح مشغول انا الحين ,,, مع السلامة
طلعنا من البيت ورحنا للمسجد وكان الامام فايز اخو ابراهيم ,,, بعد ماطلعنا من المسجد
ابراهيم = ابحتري فايز يطلع من المسجد ونجيب سيارة خالد

انا = اوووه صح تصدق نسيت سيارته ,,, طيب انا ابروح للبيت الحين بس انتبه لا تلبقون سيارة خالد بالحارة ,,, لبقوها بأي مكان لو بالحارة الثانية
ابراهيم مستغرب = ليه .؟
انا = عشان مايشوفها ابو عبدالله ,,, وش بنقوله اذا شاف السيارة وسألنا عن خالد .؟
ابراهيم = ايه صح ,,, والله المشكلة ,,, امممم خلاص ماعليك نلبقها باي مكان المهم نجيبها
انا = يله اجل انا مستعجل الحين ,,, احتريك
دخلت البيت ومريت المجلس وشفت خالد على حاله ,,, رحت غرفتي ولقيت سالم يبدل
انا = متى جيت
سالم = توني

انا = مريت المجلس
سالم مستغرب = المجلس .؟ لا ,,, بروح اشوفه
وجا بيطلع لكني مسكته
انا = وين وين لا تروح
سالم = وش فيه المجلس .؟

انا = اسمع خالد نايم بالمجلس لاتروحله حتى ماتزعجه
سالم بفرح = خالد نايم عندنا ,,, ( وكمل كأنه يفكر ) بس ليه ماينام ببيته
انا = هو حر ,,, رح هات سلمى ومعاذ وقل لسلمى ماتدخل المجلس ,,, ترا اللي يجي المجلس منكم بضربه
رحت للمجلس وجلست عند خالد ,,, بعد ساعة جا ابراهيم وفايز
فايز = السلام عليكم

انا = وعليكم السلام هلا فايز
فايز = هلا فيك
وراح على طول وجلس عند خالد يقرا عليه ,,, همست بابراهيم
انا = علمته .؟
ابراهيم = ايه ,,, ( ومد علي جوال ) خذ هذا جوال خالد ,,, بروح للبيت شوي يعنني جاي من المدرسة وبعدين اجي ,,, مع السلامة
بعد 10 دقايق جا ابراهيم
ابراهيم = خالد شفت ابو عبد الله قبل شوي يدخل بسيارته ,,, نعلمه .؟
انا = لا وش نعلمه ,,, بعدين يقول ليه ماجبتوه لبيتي ,,, وش نقوله نقول اننا خفنا من صالح .؟
ابراهيم = إنا لله وإنا إليه راجعون ,,, كله من صويلح هذا
خلص فايز وجا عندنا
فايز = انتم متأكدين انه مغمى عليه ,,, سبحان الله كنه نايم
وراح له مرة ثانية
فايز = خالد خالد ( وهز كتفه بشويش) خالد خالد ,,, لا حول ولا قوة إلا بالله ( وجا عندنا ) ماعليه ان شاء الله ,,, عندي موعد لازم اروح الحين ,,, ابراهيم لا تنسى تطمني عليه ,,, مع السلامة
وراح ,,, جلسنا انا وابراهيم نحتري خالد يقوم ,,,
جت الساعة 2 ونص وهو الى الحين ماصحى
ابراهيم = خالد خلنا نوديه المستشفى
انا = لا ,,, ماسمعته عيا قبل يغمى عليه ,,, اصبر ان شاء الله الحين يقوم
ابراهيم = بس خـ
وقاطعه رنين جوال خالد ,,, القيت نظرة عليه ,,, مكتوب ( الغالي يتصل بك )
انا = منهو الغالي .؟
ابراهيم = مدري ,,, بس لا ترد
انا = ماني راد
سكت الجوال ورجع يرن مرة ثانية ونفس المتصل ونفس الشي ماردينا ,,, بعد 5 دقايق رجع يرن وبنفس المتصل ونفس الشي ما ردينا ,,, وجلس الجوال يتصل اكثر من 10 مرات ,,, ارتبكنا من كثر مايتصل ,,, صرنا نروح ونرد بالمجلس
ابراهيم مرتبك = هذا اكيد ابو عبد الله يتصل يوم شاف خالد ابطى
انا مرتبك = شسواااات .؟
ابراهيم مرتبك = ياخي احس مابقلبنا رحمة ابو عبد الله بجنبنا يتصل بولده وهو عندنا مانعلمه
انا = لو نعلم ابو عبد الله الحين بيزعل منا بيقول ليه ماعلمتوني ,,, بيقول ليه ماجبتوه لبيتي ,,, وش بنقول ,,, يارب سترك يارب
رجع الجوال يرن مرة ثانية لين سكت ,,, فجأة رن جوال ابراهيم
ابراهيم = هذا فايز ( ورد على الجوال ) هلا فايز ,,, وعليكم السلام ,,, لا والله الى الحين ماقام ,,, والله مادري ,,, ان شاء الله ,,, بس المشكلة خاله يتصل عليه ,,, لا لا لا لا تقوله ,,, ايه ان شاء الله ,,, مع السلامة

رحت لخالد وجلست عنده وحطيت يدي على راسه ,,,
انا = خالد خالد قم ابو عبد الله يتصل عليك
ابراهيم = امش خلنا نطلع برا مليييييت وانا هنا ,,, احسسسسسس بنفجر
انا = اخاف يقوم مايحصل احد
ابراهيم = شوي بس ماحنا مطولين
طلعنا انا وابراهيم من البيت وتركت جوال خالد عنده
انا = ابراهيم رح عند اهلك يمكن يحترونك الحين
ابراهيم = لا انا قايلهم اني عندك

وقفنا انا وابراهيم شوي بالشارع
انا = انا برجع للمجلس
ورجعت وبعد 10 دقايق وانا بالمجلس جاني ابراهيم يركض مرتبك
ابراهيم مرتبك = خالد الحححق ابو عبد الله طلع بسيارته من الكراج شكله بيروح يدور خالد قم قم
ركضنا انا و ابراهيم ولحقنا عليه قبل يروح
انا مرتبك = عم عسى ماشر وين بتروح .؟
ابو عبد الله بخوف = الساعة جت 3 وخالد ماجا ,,, اتصل عليه ولا يرد ,,, ابروح لمدرسته
ابراهيم = ارتاح ياعم حنا بنروح عنك
ابو عبد الله = بارك الله فيكم ياعييلي بس انتم توكم جايين من مدارسكم ,,, انا بدوره ,,, اتصل عليه مايرد ,,, ( واخذ جواله ) يارب احفظ وليدي يارب ,,, ( نزل جواله وبخوف شديد ) ماااايرد ,,, ( ومشى بسيارته شوي )
انا مرتبك = اصبر ياعم ,,, لا تروح ,,, آآآآآآ ,,, خلك ياعم انا وابراهيم بندوره وان شاء الله انه طيب ,,, طف سيارتك طفها
وبعد محاولات طاعنا ابوعبد الله ورجع بسيارته داخل البيت ,,, التفتت لابراهيم مرتبك
انا = شسواااااااااات
ابراهيم = امش خلنا نروح للمجلس
دخلنا المجلس وخالد على حاله
ابراهيم = اعطيه كف ذا والا وش اسوي به ( وراح لخالد ومسك اكتافه وقعد يهزه خفيف ) خالد قم قم ابو عبدالله يبيك قم
وعلى آذان العصر رن جوال ابراهيم
ابراهيم = خالد الحق هذا ابو عبد الله وش اقوله .؟
انا مرتبك = آآآآآآ
وسكتت مدري شقول ,,, توكل ابراهيم على الله ورد
ابراهيم = الووو ,,, وعليكم السلام ,,, آآآآ ,,, لا ما ما ما ,,, مالقيناه ,,, عيّن خير عيّن خير ,,, هو وين بيروح يعني اكيد طيب ,,, هااااه سيارتي آآآآ لا انا انا انا اخذت سيارة واحد من اخواني مارحت على سيارتي ,,, تطمن تطمن ,,, انا اذا لقيته اتصلت فيك ,,, مع السلامة
وبعد شوي رن جوال خالد والغالي يتصل بك ,,, يالله كيف ابو عبد الله خايف عليه مررررة
انا = الحيييييين وشلوووووون مانقدر نروح نصلي بيشوفنا ابو عبد الله
صرنا انا وابراهيم نروح ونرجع بالمجلس ,,, فجأة تحرك خالد ويئن بصوت ضعييييف
انا و ابراهيم = خاااااااااااالد
وبلهفة رحنا له وجلسنا عنده ,,, مسك خالد راسه بقوة وهو يئن
خالد = آآآآآه آآآآه رااااسي راسي صدااااااااع آآآآآه لااااااا آآآآه
ماسك راسه بقوة وينقلب شوي بكامل جسمه على جنبه الايمن وشوي ينقلب بكامل جسمه على جنبه الايسر وياما رفع راسه وياما نزله
خالد = رااااسي راااسي آآآآه آآآآه راسي

ابراهيم = خالد ( ومسك يديه عشان يثبت خالد بمكان واحد ) خالد تسمعني
انا = خالد علاجك وينه .؟
رن جوال خالد مرة ثانية
ابراهيم = هذا ابو عبد الله خالد رد عليه
خالد = راسي راسي ( وكمل بضعف ) آآآآه راسي
تركه ابراهيم و سكتنا عنه لين يهدا شوي وبعد ربع ساعة ,,, خفت حركاته المستمرة لكن انفاسه سريعة وثقيلة التفت بضعف علينا وهو حاط يد وحده على راسه
خالد بهمس = وش هالمكان وين انا ,,, اخخخ راسي
انا = انت ببيتي ,,, الحمد الله على سلامتك
التفت لي وهو بالقوة يفتح عينه من الصداع
ابراهيم = الحمد الله على سلامتك ,,, انت اتصلت علي الساعة 9 وقلت تعاللي بسرعة ,,, وشلونك الحين .؟
خالد = ليش انا ببيتك ,,, ليه ماني ببيت خالي .؟
فجأة رن جوال ابراهيم
ابراهيم = اوووووه هذا ابو عبد الله وش اقوله .؟
خالد = ليه انا هنا
ابراهيم = خالك ابو عبد الله من اليوم يتصل عليك ,,, تقدر تروح له .؟
خالد بضعف = ابروح الحين قبل يذن الظهر
وحاول يقوم بس انا وابراهيم منعناه
انا = اصبر يارجال اولا الحين الساعة 3 ونص العصر يعني فاتتك صلاة الظهر والعصر ,,, ثانيا خالك من اليوم وهو يتصل عليك خذ جوالك شفه ,,, هو اسمه بجوالك الغالي .؟
تفاجئ خالد
خالد = العصصصصصر ( وأخذ الجوال مني وفتحه ) اوووووه لااااا
,,, ليه جبتوني هنا ليه ماني بالبيت .؟

ابراهيم = خفنا خالك يصير ماهو بالبيت وبعدين مادرينا انه بيغمى عليك
سكت خالد شوي كنه يستوعب بعدها مسك راسه
خالد بهمس = آسف ياجماعة تعبتكم
ابراهيم = افاااا عليك ماتعبتنا ولا شي بس الله يهديك خوفتنا عليك
خالد بضعف = شكلي اتعبت نفسي كثير ,,, رحت أمس اودي اهلي للرياض ورجعت بنفس اليوم .؟
انا = متى رجعت .؟
خالد = الساعة 11 في الليل ,,, بس كنت عادي ماحس بتعب ( تنهد وكمل) بس اليوم وانا في المدرسة ماقدرت اركز من الصداع واستأذنت وطلعت ,,, حاولت اركز بالسواقة وارجع للبيت بنفسي بس ,,, آآآ ,,, بس ( والتفت لبراهيم متفشل منه ) اضطريت اتصل عليك وانت بالمدرسة عجزت اتحمل راسي كان يعورني
ابراهيم = ماعليك ابو خلّود بالعكس سويت فينا خير انا وخالد طلعتنا بدري اليوم هههههه
انا = ماعليك خالد ,,, اذا كنت تقدر تقوم قم صل ورح لخالك ,,, المسكين من اليوم وهو يتصل عليك حتى كان بيروح يدور عليك بس حنا منعناه
ابراهيم = تقدر تقوم .؟
قام خالد بصعوبة ,,, مسكه ابراهيم يساعده
خالد = بروح للبيت ,,, ماقصرتوا تعبتكم معي ,,, ابروح اصـ ( ومسك راسه ) اخخخ راسي آآآه
طلع خالد من البيت بمساعدتنا واتصل ابراهيم بابو عبد الله ,,, وعلى طول المسكين طلع من بيته
ابو عبد الله بخوف = خالد وينك فيه ياولدي ليه ماترد على جوالك ,,, ( والتفت لنا ) وش فيه .؟
تركنا خالد وراح يسلم على راس خاله بس ابو عبد الله ضمه وهو شوي ويصيح
ابو عبد الله = اكيد ماكلت دواك ,,, كم مرة اقولك لا تنساه ,,, تعال اوديك غرفتك
خالد = لا خال انا اقدر اروح بنفسي احس احسن الحين ( والتفت لنا ) مشكورين شباب
وراح يترنح للملحق
ابو عبد الله = بارك الله فيكم ياعييلي ,,, الحمد الله انه طيب الحمد الله الحمد الله يارب ( وكمل بحزن ) فقدت عيالي ولا ابي افقد خالد بعد ( وغطى وجهه بشماغه وبعدها رفع راسه) حياكم ياشباب حياكم
ابراهيم الحساس بغى شوي ويصيح يوم شاف ابو عبد الله يغطي وجهه بشماغه والدليل صوته اللي تغير فجأة
ابراهيم = احم ,,, لا لا حنا ماصلينا العصر مع السلامة
انا = بنجي وقت ثاني نتطمن عليه مع السلامة
وطلعنا
ابراهيم = خالد فيه سؤال يطرح نفسه
انا = وش .؟
ابراهيم = الحين انا وانت ليه هجينا من المدرسة ,,, ليه ماستأذنا وطلعنا مثل الناس
انا = ههههههههههههههههههههههههه ههههههههههههههههههههه تصدق مدري ,,, اقول بس انا جوعااااااااااااان بروح اصلي واتغدى
بعد صلاة العشا
رحت لبيت ابراهيم عشان يروح معي لخالد ,,, اليوم ماطلع خالد ابد ,,, من آخر مرة شفته الى الحين ولا ادري كيف صحته
ابراهيم = هلا خالد
انا = هلا فيك ,,, ماتبينا نروح لخالد نشوفه .؟
ابراهيم = المغرب جبت سيارته بس ماشفته ولا شفت ابو عبد الله ,,, يله خلنا نروح
ضربنا جرس بيت ابو عبد الله وطلع لنا صالح
انا = انت دايم هنا ,,, ماعندك اهل ماعندك بيت
صالح = اليوم وينكم فيه ,,, مختفيييييين انت واياه وش عندكم .؟
ابراهيم = ماعندنا شي ,,, خالد هنا .؟
صالح = ايه هنا وش تبون فيه .؟
انا = ياخي نبيه وش دخلك انت ,,, هو وينه الحين .؟ وابو عبد الله موجود .؟
صالح = ابو عبد الله موجود
ابراهيم = وخالد وينه .؟
صالح = بغرفته ,,, تعالوا تعالوا
وراح للملحق ولانه في الحوش دخلنا وراه ,,, وكان الملحق مقفل ,,, ضرب صالح باب الملحق بعنف
ابراهيم = شوي شوي
صالح = ماتشوفه صاك على نفسه
مسكت يد صالح وجريته شوي
انا = خلاص خله يمكن مشغول
سحب صالح يده مني
صالح = نطلعه غصب عنه
وضرب الباب ضرب اعنف من الاول
صالح بصراخ = افتححححححح الباااااااااااب
همس ابراهيم باذني
ابراهيم = هو يبيها من الله
سمعنا صوت خالد من ورا باب غرفته
خالد = قسم بالله ان ماذلفت لوريك شغلك ,,, ازعجتني
ابراهيم = ههههههه لا الحمد الله طيب طيب هههههههههه
صالح = شفتوا قلة أدبه ,,, مايحترم احد ( ورجع يضرب الباب ويكمل بصوت عالي ) افتح اقول افتح ابراهيم وخالد يبونك
انا اكلم خالد من ورا الباب = خلاص خالد اذا كنت ماتبي تطلع لا تطلع نجيك وقت ثاني
اول ماخلصت كلامي وينفتح الباب ,,, وكان خالد لابس بنطلون وطلع لنا وهو يلبس فنيلته
خالد = والله آسف حسبته المروح ذا ,,, مادريت انكم معه ,,, حياكم حياكم
دخلنا غرفته
خالد = اللي اسمائهم بحرف الصاد مايدخلون
ودفع صالح برا الغرفة وقفل الباب عنه
خالد = حياكم الله الغرفة حوسة عذروناا ههههههههه
كان اثاث الغرفة فخم ,,, السرير والطاولة والدولاب و الاب توب محطوط على الطاولة وشغال ,,, شكله كان يلعب فيه لكن فعلا كان كل شي حوسة وخاصة السرير والطاولة
جلس ابراهيم على السرير وجلست بجنبه ,,, اخذ خالد كرسي الطاولة وجلس قبالنا ,,, كل هذا وصالح مازال يضرب الباب ويصارخ علينا
ابراهيم = شكلك مشغول مانبي نزعجك بس حبينا نتطمن عليك
خالد = لا والله ماني مشغول ولا شي ,,, بالعكس فاضي ولا عندي شي اسويه ( وحط يديه على اذانيه ) اخخخ ازعجنا هذا ,,, مع ان معه سبير الغرفة الا انه مثل ماتشوفون يقعد يطق يطق لين افتح انا ,,, يبي يزعجني وبس
انا = وهو من متى وهو هنا .؟
خالد = من المغرب وهو مطيح عندنا
ابراهيم = وانت ليه حابس نفسك هنا ,,, الى الحين تعبان .؟
خالد = لا ,,, الحمد الله اخذت مسكنات و الحين احسن ,,, بس صالح مطيح عندنا ومالي خلق اشوف وجهه ,,, قلت ادخل النت احسن ,,, اووووووه ازعجنا هذا
انا = دخله فكنا منه
قام خالد بعصبية وفتح الباب ومسك ثوب صالح وجره داخل الغرفة
خالد بعصبية = ازعجتنااااا ( ودفع صالح على ورا ) ياخي معك السبير ليه ماتدخل بهدوء
صالح بغرور = لا السبير عند الحاجة اذا كنت نايم مثلا او مانت هنا ذيك الساعة نستخدم السبير
عصب خالد اكثر ومسكه
خالد بعصبية = الواحد ماله خصوصية عندك ,,, قسم بالله كرهتني بعيشتي
قام ابراهيم وحال بينهم
ابراهيم = هدوا اللعب شباب ,,, صالح وش فيك قسم بالله صاير كريه
قمت ومسكت خالد
انا = امش ياخالد ودنا المجلس نبي نسلم على ابو عبد الله ونمشي ,,, اكلت علاجك .؟
التفت خالد على الطاولة لأن فيها اشرطة الحبوب متنثرة على الطاولة اللي فيها الاب توب وبعض الاشرطة فاضية
خالد = اكلته والا ماكلته ماينفع ,,, حياكم للمجلس ,,, حياك ابراهيم
طلعنا من الغرفة ودخلنا المجلس وصالح معنا ,,, جانا ابو عبد الله يهلي ويرحب
بعد نص ساعة من السواليف والاخبار ,,, رن جوال خالد
خالد = هلا ,,, وعليكم السلام ,,, ايه عرفتك ,,, هاه وش صار تراكم طولتو ,,, ( وطوّل وهو ساكت وابتسم رغم الهالات الواضحة اللي بوجهه) ,,, ههههههههه طبعا حبيبي هالايام مافيه الا بالقوة ,,, اخذت اللي ابيه منه واطمئن انا عند وعدي ,,, بس عطني العنوان مرة ثانية لو سمحت,,, ( حك راسه) والله شف يالحبيب انا مادل هنا زين لكن اباخذ معي واحد واتصل عليك ,,, بس الساعة كم اقابل المدير .؟ ,,, خلاص حلو ,,, قلت لك اطمئن وطمنه انا عند وعدي ,,, خلاص اذا جيت للرياض تفاهمت معه ,,, هلا حياك الله ,,, مع السلامة
ونزل جواله وتوسعت ابتسامته اكثر ,,, والتفت لي ,,, وقبل يقولي شي
ابو عبد الله = تتفاهم مع من .؟
التفت خالد لبو عبدالله
خالد = مع واحد
ابو عبد الله بعصبية = ادري انه مع واحد ,,, ليه ماتبي تقولي .؟
خالد = وش اقولك .؟
ابو عبد الله بخوف = هذا بدر .؟ لا يكون بتروح لهم للرياض .؟
خالد = لا ماهو بدر هذا واحد ثاني
صالح = مدير وش اللي بتقابله .؟
خالد = البزارين لا يتكلمون ( والتفت لي ) خالد ممكن شوي .؟
وقام و قمت معه وقبل نطلع من المجلس التفت خالد لصالح
خالد = ان جيت وراي قسم لفجّر فيك
وطلعنا ودخلني غرفته
خالد = خالد انت تدور على وظيفة صح .؟
نزلت راسي
انا = ايه
خالد بابتسامه = وابشرك لقيتلك وظيفة
من الفرح ضحكت غصب عني
انا بفرح = والله ,,, وييييييين .؟
خالد = واحد اعرفه بالرياض لقـ
وقاطعته ,,, خيييييييييييييـبة
انا بخيبة أمل = الوظيفة بالرياض .؟
خالد = ههههههههه لا لا ماهي بالرياض الوظيفة هنا
انا بفرح = احللللف
خالد = هههههههههه وش فيك مانت مصدق
قربت اصيح من الفرح اخيرا اخيرا
انا = وييييييييين .؟
خالد = بالمستشفى الأهلي
المستشفى الاهلي هذا دورت عندهم ومن شروطهم شهادة كمبيوتر ,,, لا بالله راحت الوظيفة اجل
انا = المستشفى الاهلي .؟ انا رحت لهم مرة وقالوا لازم شهادة كمبيوتر ماعندي شهادة منين اجيبلهم
حط يده على كتفي وابتسم اكثر
خالد = هالمرة مايحتاج ,,, اسمع يوم الاثنين نروح انا وانت للمدير ونقابله وصدقني بتتوظف عنده من دون شهادة الكمبيوتر ,,, ( وكمل بنبرة غريبة ) ياحبيبي كل شي بالواسطة يمشي
انا بحزن = انا ماعندي واسطة
خالد = موعدنا يوم الاثنين ,,, خلنا نروح عند خالي الحين ,,, بس اسمع لا تقول لحد لين يتم كل شي
وطلع من الغرفة ,,, ماعندي واسطة ,,, ولا عندي شهادة ,,, معقول انا بتوظف ,,, بس مدري ليه احس انه ماراح يصير شي ,,, كل المستشفيات يحتاجون شهادة كمبيوتر
= خااااااالد
انتبهت لخالد اللي يحتريني
انا = السموحة سرحت شوي
خالد = هههههههههههه امش
جلسنا شوي عند ابو عبد الله ورجعنا انا وابراهيم و كلن على بيته ,,,
متى يجي يوم الاثنين ,,, خايف خايف ,,, اخاف مايصير شي ,,, اخاف بعد هالفرح ماحصل شي ,,, خالد يقول بالواسطة ,,, من وين لي واسطة ,,, خالد لو انه من هالديرة كان قلت يمكن يعرف احد يتوسط لي هنا ,,, بس خالد من الرياض حتى الاماكن في هالديرة مايدلها بيعرف لي احد يتوسط لي ,,, حتى لو كان يعرف ,,, معارف خالد هم معارف ابو عبد الله ,,, العم ابو عبد الله تعب وهو يدور لي على وظيفة ماحصل ,,, لو ان لهم قريب واسطة كان راح له ابو عبد الله من مبطي وماتعب نفسه كل هالتعب على الفاضي ,,, وش وراك ياخالد ,,,
اووووه مو مهم وش وراه المهم احصل وظيفة ,,, يارب يارب
الرجوع الى أعلى الصفحة اذهب الى الأسفل
✿فلسفة مبدع ✿
محقق مشارك
محقق مشارك


القسم المفضـل . : قسم المتحري كونآن ♥
الآنمي المـفضل . : Naruto
الجنـس . : انثى
المسآهمآت . : 536
شهرة العضو : 0
المـوقـع . : In the hearts of my wonderful friends

مُساهمةموضوع: رد: رِوَآيَــهـ {غُــمُــوض خَــآلِـــدْ}   الأحد نوفمبر 10, 2013 8:24 pm

 

راائع .. حمااس
كمليه بلييز
الرجوع الى أعلى الصفحة اذهب الى الأسفل
شارلوك هولمز القرن 22
محقق لامع
محقق لامع


نـقــــآط الـتـمـيـز . : 25
القسم المفضـل . : قسم الثقآفة العآمة والفن ♥
الجنـس . : انثى
المسآهمآت . : 673
شهرة العضو : 28

مُساهمةموضوع: رد: رِوَآيَــهـ {غُــمُــوض خَــآلِـــدْ}   الأحد نوفمبر 10, 2013 11:39 pm

ياااااه كل ها الابداع وانا مادري
حرام والله
ابداع والله ابداع
خسارة والله
بس مايهم هلا جيت وانا اناطر البارت القادم بفارغ الصبر
لاتطولين
ترى من حماستي للقصة وانا لي ساعة اقرا فيهم ماوقفت وحتى الخدمة بلشت رحت فعلت خدمة جديدة وانا وراي امتحان باكر
بس الصدج قصة لاتفوت
تسلم اناملك على نقل قصة بهذا المستوى
تسلمي
انتظر البارت القادم على احر من الجمر
الرجوع الى أعلى الصفحة اذهب الى الأسفل
ὼiɲtҽr ƒloώęr♫
محقق لامع
محقق لامع


القسم المفضـل . : قسم المتحري كونآن ♥
الآنمي المـفضل . : Death Note
الجنـس . : انثى
المسآهمآت . : 598
شهرة العضو : 15
المـوقـع . : حَاليًّـا ، في أعمَآق الخَيال "،
العـمــر . : 17

مُساهمةموضوع: رد: رِوَآيَــهـ {غُــمُــوض خَــآلِـــدْ}   الجمعة ديسمبر 06, 2013 7:34 pm

*8*


الاحد
بعد صلاة العصر وانا طالع من المسجد
= خااااااااالد
التفتت وراي وكان ابراهيم يناديني
انا = هلا ابراهيم
ابراهيم = خالد شفت خالد .؟

قلت امزح معه
انا = لا ماشفت نفسي اصبر ابدورني
ابراهيم = ههههههه لا اقصد خالد تركي شفته .؟
انا = لا ,,, وش تبي فيه .؟
ابراهيم بغرور= اليوم معالي سموي عازمكم على كوفي على كيف كيفك
انا = تقول عازمكم .؟ انا ومن .؟
ابراهيم = انت وخالد وصالح وماجد
انا = خالد وصالح ,,, تبي تحول الكوفي الى حلبة مصارعة انت .؟
ابراهيم = ههههههههههههههههههههههههه ههههه وش تبيني اسوي اجل ,,, اخاف اعزم واحد واترك الثاني ويزعل علي واحد منهم
صرنا نمشي لين دخلنا الحارة ,,, ودخلت البيت شوي اقول لخلود اني بطلع وبعدها رحت لابراهيم ولقيت ماجد عنده
انا = السلام عليكم
ابراهيم وماجد = وعليكم السلام
ابراهيم = باقي صالح وخالد

واخذ جواله يتصل عليهم
انا = اقووووووول وش المناسبة عندك
ابراهيم = مافيه مناسبة بس من زمان ماطلعنا مع بعض لمكان محترم

جا صالح وانضم معنا
صالح = السلام عليكم

الجميع = وعليكم السلام
ابراهيم = وين خالد مايرد على جواله

صالح = وانا وش دراني عنه
ماجد = وشلون ماتدري و انت طالع من بيت خاله تو
انا = رح صالح ناده
صالح = خلونا نروح موب لازم يصير معنا ,,, يله يله بس امشوا
ابراهيم = لا وين ,,, اخاف يزعل
صالح = خله يزعل
ابراهيم = مافيك خير انت ( واخذ جواله يتصل) افففف مايرد ,,, ابروح اطق الجرس عليه
راح ابراهيم وبعد شوي جا
ابراهيم = تو قايم من النوم يقول بيصلي ويجي الحين
بعد ربع ساعة وحنا بسيارة ابراهيم نسولف جانا خالد لابس بنطلون كالعادة وفنيلة كحلية
صالح = يااااخي انت ماتحترم احد شف كلنا كاشخين الا انت
خالد بملل = امسينا وامسى الملك لله ,,, دايم بمسي واصبح على وجيه الشياطين ,,, وش دخلك انت ,,, حتى نسيتني اسلم ( والتفت لنا ) ماجد خالد ابراهيم و بس السلام عليكم
انا وابراهيم وماجد = ههههههههههههههه وعليكم السلام
ماجد = ههههههه و صالح مهو السلام عليه هههههههههه
ابراهيم = ههههه اركب اركب
رحنا للكوفي وصلينا هناك المغرب ورجعنا وكلن دخل بيته لأن انا وابراهيم وصالح وماجد علينا امتحان بكرة إلا خالد لأنه مهو من نفس مدرستنا ,,, وطوال اليوم ماتكلمت مع خالد عن موضوع الوظيفة ,,, افففف متى يجي يوم الاثنين ,,, يارب اتوظف يارب ,,, مع اني غاسل يدي بسبب هالشهادة يعني لازم كمبيوتر اف بس
الاثنين
بعد صلاة العصر رجعت على طول للبيت اجهز ملفي قبل يمرني خالد نروح نقابل مدير المستشفى الاهلي ,,, يارب يارب اتوظف انا رايح لهم قبل وماحصلت شي ,,, الله يستر بس ,,, جهزت ملفي وطلعت من البيت احتري خالد ,,, بعد 5 دقايق طلع خالد من بيت خاله لابس بنطلون لونه سكري وفنيلة سودا ,,, استغربت بيقابل مدير ويلبس بنطلون
خالد = السلام عليكم ,,, هاه جاهز .؟
انا = وعليكم السلام ,,, ايه جاهز
خالد = خالد تدل مكان المستشفى الاهلي والا اتصل اخذ العنوان مرة ثانية .؟
انا = ايه ادله ( وكملت بارتباك ) خالد انا رحت لهم قبل وماستفدت شي يقولون لازم شهادة كمبيوتر
ابتسم وحط ذراعه على كتفي وقربني منه
خالد بابتسامة = توكل على الله وخلنا نمشي
انا بارتباك = آآآآ ,,, طيب اجيب ملفي
دخلت البيت بسرعة وقلت لخلود اني بطلع ورحت لخالد اللي كان ينتظرني بسيارته ,,, طوال ماحنا نمشي وانا مرتبك معقول بتوظف معقول يارب يارب ,,,
فجأة رن جوال خالد
خالد = هلا اسلام ,,, وعليكم السلام ,,, الحمد الله بخير ,,, وشلونك .؟ ,,, كيييف .؟ ,,, مكة .؟ ,,, ومتى .؟ ,,, و قلت لامي .؟ ,,, ووش قالت .؟ ,,, اكييييييد ترا ابتصل عليها وأسألها ,,, خلاص اوكي ,,, ايه خلاص موافق ,,, بس هاه تراه يوم واحد بس ويوم الجمعة ترجع ,,, بكرة ان شاء الله اجيكم ,,, بس اسلام انا عندي شرط ,,, امممم تشتري لي هدية ,,, ههههههه ,,, بس .؟ طول عمرك بخيل .... خلاص بكرة وانا عندكم اذا جيت حجزت لك ,,, ايه ,,, ههههه ان شاء الله عمي ,,, ( وكمل بنبرة غريبة وبصوت هامس ) اسلام ادع الله يشفيني ,,, تسلم ,,, مع السلامة
وابعد الجوال عن اذنه وقعد يضغّط الجوال وهو يسوق
خالد = مشكلة الهندي اذا صار مطوع يبي كل شوي يروح لمكة ههههههه
انا من الارتباك مارديت عليه ,,, ويوم شاف خالد اني مارديت التفت لي والجوال باذنه
خالد = خالد توكل على الله ان شاء الله بتتـ ( ورد الطرف الثاني عليه بالجوال ) الووو السلام عليكم ,,, وشلونكم ,,, بخير ,,, الحمد الله طيب ,,, وشلونك.؟ ,,, بخير دامك بخير ,,, اممم يمه قالك اسلام انه يبي يروح مكة.؟ ,,, وانتي موافقة .؟ ,,, ايه كلمني ,,, لا بس اتصلت اتأكد منك ,,, خلاص انا بجيكم ,,, لا مافيه تعب ,,, يمه لا تخافين ,,, مافيه تعب ابد ,,, انا اصلا جاي للرياض جاي ,,, يمه الله يخليك لا تخافين ,,, صدقيني مافيه تعب ,,, ايه اكيد ,,, هههههه احلف يعني ,,, طيب ,,, ان شاء الله ,,, اطمئني ,,, ان شاء الله ,,, طيب ,,, طيب ,,, يوصل ,,, مع السلامة
وصلنا المستشفى ووقف خالد السيارة والتفت لي
خالد = تبي الصراحة ياخالد انا ماعرف عنك معلومات الا من خالي وعشان اصير على بيّنة وانا اتكلم مع المدير احتاج اشوف ملفك ,,, تسمح اشوفه .؟

انا مرتبك = آآآآ ,,, طبعا اكيد
وعطيته ملفي ,,, فتحه خالد شوي وبعدها التفت لي
خالد = اخذت دورات او أي شي .؟
انا = لا ,,, ماكان عندي عشان اسجل دورات
خالد = معك لغة .؟
نزلت راسي وهمست
انا = لا
حط خالد يده على فخذي
خالد = بتتوظف ان شاء الله ,,, خلنا ننزل
عطاني ملفي ونزل ونزلت معه ,,, وكان يسأل مباشرة عن مكان المدير لين وصلنا له
السكرتير = لكم موعد .؟
خالد = طبعا
السكرتير = من اقوله .؟
خالد = خالد
السكرتير = ثواني
وراح السكرتير وسمح لنا بالدخول ,,, وقبل ندخل على المدير ,,, اخذ خالد الملف مني ودخلنا ,,,
جلس خالد وجلست قباله وانا مرتبك ,,, كأننا أب ويسجل ولده ,,, خالد هو اللي يتكلم وانا ساكت ومرتبك
خالد = معك خالد
المدير = اهلا ,,, أي خدمة
خالد = معك خالد من طرف الدكتور وينلي
وينلي اسم ذا والا وش
المدير = انت الاستاذ خالد تركي .؟
استاااااذ ,,, خالد استاذ خله يخلص من الثانوي وبعدين ناده استاذ
رد عليه خالد بابتسامة غريبة ماهي ابتسامته اللي دايم ,,, كنه يسخر من المدير
خالد بابتسامة = نعم انا خالد تركي
المدير = انت اللي تبي الوظيفة .؟
أشر خالد لي
خالد = لا ,,, اخوي خالد هو اللي بيتوظف
هنا التفت لي المدير
المدير = ممكن الملف يأخ خالد .؟
مد خالد الملف له لانه معه ,,, وقعد المدير يتصفحه شوي وبعدها اغلق الملف ,,, والتفت لي
المدير = معك شهادة حاسب .؟
انا مرتبك = لا
المدير = ولا حتى دورات .؟
انا مرتبك = ولا حتى دورات
التفت المدير لخالد
المدير = الوظيفة المناسبة سكيورتي فقط
خالد بغرور = الظروف ماتسمح ياليت تشوف وظيفة ثانية وتكون محترمة
انصدمت كيف يكلم المدير كذا ,,, لا بالله طارت الوظيفة
المدير = بس ياستاذ خالد ,,, هذا أخر مؤهلاته المتوسطة
خالد = طبعا بتكون أخر مؤهلاته المتوسطة لأنه الى الأن ماتخرج من الثانوي
التفت لي المدير وبعدها التفت لخالد وبعدها نزل راسه يفكر وبعد شوي اخذ ورقة يكتب فيها وبعد ماخلص مد الورقة لي
المدير = راح اعينك في الاستقبال في القسم الرجالي
شهقت من الفرحة ,,, نزل خالد يده وأشر لي يعني لا تفضحنا
خالد = ومتى اوقات الدوام .؟
المدير = استقبال اكيد بيكون العمل الفترة الصباحية والمسائية
خييييييييييـبة صباح ومساء ,,, واخواني
خالد = لو سمحت ,,, خالد الى الأن يدرس يعني صعب يداوم في الفترة الصباحية

المدير = هذي مشكلة الاخ خالد ( والتفت لي ) تقدر تترك الدراسة وتداوم عندنا .؟
انا مرتبك = آآآآ ,,, هذي آخر سنه لي
المدير = مشـ
و قاطعه خالد
خالد = كلمك الدكتور وينلي اتلانتس.؟ اذا ماكلمك ابتصل عليه عادي ماعندي مشاكل
التفت المدير له
المدير = طبعا كلمني ,,, بس فترة وحدة ولموظف استقبال ما يصير
خالد = بس انتم وافقتوا على طلبه
المدير = وافقنا بسـ
خالد = اجل بترد بكلامك بعد ماوافقت
المدير = لا ,,, بس هذا عمل في مستشفى انت على بالك انه في مدرسة او كلية عشان فترة وحدة بس ,,, هذا مستشفى ياستاذ خالد
خالد = من اللي كلمك بالضبط الدكتور وينلي او ناصر .؟
المدير = من ناصر .؟
خالد = الدكتور ناصر
المدير = اللي كلمني الدكتور ناصر
مد خالد رجله وطلع الجوال من جيب بنطلونه
خالد = والدكتور ناصر بنفسه ابلغني قبل أمس بانكم موافقين على توظيفه لفترة وحدة وعطيتوه موعد
شسالفة ,,, ماني فاهم شي ,,, سكت شوي المدير وبعدها التفت لي ومد يده لي يبي الورقة اللي عطانياها ,,, افااا لا يكون رجع بكلامه
المدير = الورقة
عطيته الورقة وكتب فيها وبعدها مدها لي مرة ثانية
المدير = موظف استقبال في الفترة المسائية تحت التدريب لمدة اسبوعين ويبدأ دوامك في الاسبوع القادم ,,, تقدرون تروحون الحين لمدير الموظفين لابلاغه
التفتت لخالد فرحااااان ماني مصدق ,,, ابتسم لي خالد وقام
خالد = شكرا ,,, بالاذن
وطلع وطلعت معه و رحنا لمدير الموظفين وبعد ماخلصنا من عنده طلعنا من المستشفى ,,, ناظرت خالد وهو يمشي قدامي رايح لباب السواق وقبل يفتح الباب ناديته
انا = خالد
التفت لي
خالد = هلا
فكيت ازمة ياخالد ,,, فتحت باب رزق لايتام ,,, انقذتني وانقذت اخواني ,,,
مشيت لين وصلته ,,, مادري وشلون اشكره ,,, ماقدرت امنع نفسي اني اضمه بقوة ,,, لصق خالد بسيارته متفاجئ مني ,,, وبعد ماستوعب ضحك ولف ذراعه علي
الحين اقدر اشتري لسالم الشنطة اللي هو يبي ,,, اقدر اشتري لخلود كل اللي تبيه ,,, الحين ماراح يحسون سالم وخلود بالنقص انا بنفسي ماراح احس بالنقص ,,,الحين اقدر اسدد الديون ,,, اقدر استأجر شقة ,,, الحين نقدر نعيش زي الناس
خالد = خــالد خلاص عاد فكنــي
تذكرت اني الى الحين ضاغط عليه ,,, ضحكت على كلمته وابعدت عنه
انا قربت اصيح = خـ خالد فكيت ازمة ,,, مـ مشكور ,,, مدري وشــ
لف ذراعه على كتفي وقربني منه
خالد = الحمد الله ,,, وضعك كان صعب ,,, واللي زاد الطين بلة انك مامعك دورات تنفعك ,,, مثل ماقلت لك قبل ياخالد كللللللل شي يمشي بالواسطة ,,, اسألني انا ,,, كل شي ياخالد حتى الشرطة ( تنهد وكمل ) يله اركب ,,, وتراني عازمك بمناسبة الوظيفة
ركبت السيارة وطوال ماكنا نمشي وانا افكر ,,, اسلوب خالد مع المدير غريب ,,, يمكن المدير قريبه ,,, بس وشلون يكون قريبه وخالد هو اللي عرّف بنفسه للمدير ,,,
لحظة لحظة وش الاسم اللي ذكره خالد وش اسمه وش اسمه ,,, اسمه غريب ,,, ويني او ويلي شي زي كذا وش سالفته ووشو هذا ,,, من اسمه اكيد موب سعودي ,,, الغريب في الموضوع انه على طول اول ماذكر خالد الاسم عرف المدير السبب اللي حنا جايين له ,,, طيب هو كان بيخليني سكيورتي ,,, لما قاله خالد الضروف ماتسمح على طول المدير سمع كلامه وخلاني في الاستقبال ,,, وناصر ,,, ذكروا ناصر بعد ,,, من ناصر هذا
التفتت لخالد ,,, او مثل ماناده المدير ,,, الاستاذ خالد
وش سالفتك ياخالد كل يوم اكتشف فيك شي غريب ,,, وصلنا لمقهى كوفي وبعد ماجلسنا
انا = خالد شسالفة .؟
التفت خالد لي مستغرب
خالد مستغرب = وش سالفته .؟
انا = من ويني ,,, هذا اللي اسمه غريب اللي قلت اسمه عند المدير قبل شوي
خالد بابتسامة = هذا اللي توسط لك
انا مستغرب = ماعرفه ,,, اول مرة اسمع فيه ,,, ووش يعرفه فيني عشان يتوسط لي .؟
خالد = انت ماتعرفه وهو مايعرفك ,,, بس انا اعرفكم ثنيناتكم
انا = يعني توسط لي عشانك .؟
هز خالد راسه بايه
انا = وشو هو ,,, من اسمه ماهو سعودي
خالد بابتسامة = هذا واحد دكتور بالرياض اسمه وينلي
انا = ويتوسط لواحد مايعرفه عشانك ,,, شكلك غالي عنده مرة
خالد = ههههههههههههههههههههههههه هههههههههههههههههههههه
مات من الضحك ,,, وش فيه ذا
خالد = هههههههههههههههههههههه غالي .؟ ههههههههههههههههههههههههه ه
انا = ليه تضحك .؟ ,,, ياخي واضحة ,,, ماتوسط لي وهو مايعرفني الا انك غالي عنده ويعزك
سكت خالد وناظرني وهو يبتسم
انا = ليش تطالعني كذا .؟
خالد = وينلي الكلب ...ماتوسط الا لمصلحة
انصدمت يشتمه وهو المسكين متوسطلي عشانه
انا = وليش تقول عنه كذا .؟
خالد = الكلب .... اشرف منه
طيرت عيوني فيه وسكتت ,,, وش فيه ذا انقلب ,,, كمل خالد كلامه
خالد = وينلي نصراني ,,, أمريكي ,,, تعرف معنى امريكي .؟ ,,, والا اشرحها لك .؟
ماهو هذا خالد ,,, ابتسامته اختفت واسلوبه في الكلام اختلف ,,, تلفتت يمين و يسار في الكوفي لا يكون مضيع وأظن ان اللي جالس معه خالد
خالد مستغرب = وش تدور .؟
انا = خالد شسالفة .؟
خالد = وش سالفته بعد .؟
انا = ليه تشتمه بهالشكل .؟
خالد = اجل امدحه .؟ اقولك امريكي نصراني ,,, ماهو مسلم
انا = ماقصدت كذا ,,, اقصد انه توسط لواحد مايعرفه بس عشانك تقوم آخر شي تشتمه
خالد = اقولك توسط لمصلحة
انا = ووش المصلحة اللي يبيها دكتور من طالب ثانوي
ابتسم خالد
خالد = المهم حصلنا على اللي نبي ,,, امممم اقول خالد خذها نصيحة مني حاول تسجل في دورات وتحصل على شهادة كمبيوتر ,,, لأني تبي الصراحة مارتحت لهالمدير واخاف يطردك بعد كم شهر مارتحت له الصراحة
تذكرت الحكمة اللي تعلمتها من معرفتي بخالد وابتسمت = احكم على الناس بأفعالها و اقوالها وليس بأشكالها
خالد = حتى ولو ما ارتحتله
انا = حتى انا اول ما عرفتك كنت ما ارتحلك ,, لكن الحين عزيز و غالي
ناظرني وبعدها نزل نظره على الطاولة اللي قدامنا يدور عن شي ,,, فجأة اخذ كيس سكر القهوة ورماه علي
خالد = اثرك ماترتاحلي
انا = هههههههههههههههههههههه اقولك هذا من اول الحين عزيز وغالي
خالد = ههههههههههه تسلم
انا = طيب منهو ناصر .؟
خالد = مساعد وينلي,,, تقدر تقول ذيله
انصدمت ليه يتكلم عنهم بوقاحة بهالشكل
انا = يقربلك .؟
خالد = لا ولا عمري شفته
انا = من وين تعرفه هالدكتور الامريكي .؟ هو طبيبك اللي يعالجك .؟
خالد = لا ,,, هذا واحد اعرفه من زمان ,,, من قبل مايجيني المرض ,,, اصلا تخصصه بعيد عن مرضي
انا = ووش المصلحة اللي يبيها منك .؟
خالد = قرب يذن المغرب ,,, وش رايك نتمشى بالسيارة شوي .؟
يتهرب ,,, دايم يتهرب من اسئلتي ,,, سألته عدة مرات عن ابوه وتهرب مني والحين اسأله عن الامريكي وتهرب ,,, مالي الا عمي ابوعبد الله أسأله وارتاح ,,, اكيد يعرفه ,,,
تمشينا لين اذن المغرب وبعد الصلاة رجعنا ,,, وقف خالد سيارته قدام بيتي ,,, وقبل مانزل مسك خالد يدي ,,, التفتت له مستغرب
خالد = لحظة قبل تنزل
ومد يده وفتح الدرج اللي قدامي وطلع كرتون الجوال النوكيا اللي طلب مني آخذه ,,, ومده لي
خالد = هالمرة اتمنى تقبله
انا = لا يمكن
خالد = بمناسبة الوظيفة ,,, الهدية لا ترد ياخالد
انا = الوظيفة اصلا بسببك ,,, انت اللي سعيت لها عشاني ,,, والوظيفة اكبر هدية بالنسبة لي ,,, مشكور و ماتقصر
وفتحت الباب عشان انزل لكن مسك يدي مرة ثانية
انا = خالد وبعدين معك
خالد = الوظيفة من وينلي الحقير مو مني ,,, الجهاز هذا هو اللي مني ,,, يعني تقبل هدية من نصراني وماتقبل هدية من اخوك المسلم ( وابتسم ابتسامة واسعة )
انا بحزن = انت تشفق علي
خالد = انا ماشفق عليك انا اغليك لأنك صديقي ,,, تذكر بيوم العزيمة يوم تقولي اعتبرني صديقك ,,, هذا انا اعتبرك صديقي بس انت شكلك ماتعتبرني صديقك
طالعته احاول افهم بايش يفكر فيه ,,, وصدره أي قلب يحمل وليه يسوي هذا كله لي وليه انا ,,, ومامنعت نفسي اسأله هالسؤال
مديت يدي وضربت صدره كأني اضرب باب
انا = هالصدر أي قلب داخله .؟
سكت خالد شوي وبعدها رد
خالد = داخله قلب عانى من الوحدة
انا = احمد ربك انت مانت وحيد ,,, وش تقول عني انا ,,, لا أخ اعتمد عليه ولا أب
خالد = بس لك صديق مو صديق واحد بس ,,, اصدقاء ياخالد ابراهيم وصالح وماجد ويمكن غيرهم بعد ,,, انا لا أخ ولا صديق ولا أب ,,, اقبل الجهاز وصر صديقي ولا تحرمني من الصداقة اللي ابحث عنها
انا مستغرب = ولا أب .؟ ,,, وأبوك .؟ ,,, انت بنفسك قلت انه حي
خالد = خالد اتمنى تقبل الجهاز ,,, الا اذا كنت رافض صداقتي هذا شي ثاني
تهرب من السؤال مرة ثانية
مديت يدي واخذت الكرتون
انا بابتسامة = عنيد ,,, وانا قابل صداقتك بدون جهاز ولا غيره
خالد بابتسامه = بكرة الثلاثاء ومضطر اسافر للرياض يكون بينا اتصال
انا = بتغيب الاربعاء بعد .؟
خالد = شسوي مضطر
ونزل ونزلت ,,, دخلت البيت وانا فرحان قعدت ادور خلود اببشرها عن الوظيفة
انا = خلوووووووووووود ,,, خلود ,,, خلووووووود
خلود = هااااااااااااااااااااه
سمعت صوتها وعرفت انها في غرفتها
انا بفرح = خلود خلوود توظفت هههههه اخيرا توظفت
خلود بعدم تصديق = قل والله
انا = ههههههههههههههه ,,, وظيييييييفة والدوام الاسبوع الجاي
خلود بفرح = قل والله
انا = هههههههههههههههه ولا والفترة المسائية بس يعني ينتهي الدوام الساعة 8 في الليل يعني وظيفة من دون ماترككم اخر الليل
خلود بفرح = قل والله
وانا = ههههههههههههههههههه وش فيك معلقة على قل والله
خلود بفرح = ماني مصدقة ,,, ههههههه اخيرا الحمد الله الحمد الله
وسكتت يوم شافت الكرتون بيدي ,,, بدري
خلود مستغربة= وش هذا .؟
واخذته مني وعلى طول عرفته
خلود = وااااااااااااااااااو جوال
وفتحت الكرتون
خلود = واااااااااااااااو وابو كميرا بعد ,,, احسن من جهازك الاول ,,, من وين لك .؟
انا = هدية
خلود مستغربة = قل والله
انا = هههههههههههههههههههه
خلود = ياسلاااام احب اصور ,,, ابصور كل شي ,,, وين شريحتك بنشغله ,,, ابي اصور ,,, حلو يهبل

خلود دايم تضحكني بحركاتها ,,, رحت وجبت شريحتي وشغلناه وطوال الليل وهي تصور الا تصوير نفسها طبعا
اخخخ بس لو اعرف وش يبي الامريكي الدكتور من خالد الطالب
الرجوع الى أعلى الصفحة اذهب الى الأسفل
✿فلسفة مبدع ✿
محقق مشارك
محقق مشارك


القسم المفضـل . : قسم المتحري كونآن ♥
الآنمي المـفضل . : Naruto
الجنـس . : انثى
المسآهمآت . : 536
شهرة العضو : 0
المـوقـع . : In the hearts of my wonderful friends

مُساهمةموضوع: رد: رِوَآيَــهـ {غُــمُــوض خَــآلِـــدْ}   الأحد ديسمبر 08, 2013 8:23 pm

 

راائع جدااا
انتظر التكملة
حمااااس
الرجوع الى أعلى الصفحة اذهب الى الأسفل
 
رِوَآيَــهـ {غُــمُــوض خَــآلِـــدْ}
استعرض الموضوع السابق استعرض الموضوع التالي الرجوع الى أعلى الصفحة 
صفحة 2 من اصل 2انتقل الى الصفحة : الصفحة السابقة  1, 2

صلاحيات هذا المنتدى:لاتستطيع الرد على المواضيع في هذا المنتدى
 :: ◕ الثـقـافة العـامة والفـن ◕ :: ●• قسم الروايات ♪-
انتقل الى:  
الساعة الأن بتوقيت (السعودية)
جميع الحقوق محفوظة لـ
 Powered by GIN12 ®{Conan-Anime.com }
حقوق الطبع والنشر©2011 - 2010

جميع ما يكتب في المنتدى لا يعبر عن رأي الادارة وانما يعبر عن وجهة نظر كاتبها..
والادارة غير مسؤوله عن ما يكتب او ينشر في المنتدى
..